Türkiyə XİN rəhbəri H.Fidan İrana rəsmi səfər edəcək

Türkiyə Respublikası Xarici İşlər naziri Hakan Fidan noyabrın 30-da İrana rəsmi səfər edəcək. Bu barədə məlumatı diplomatik mənbələr yayıb. Bildirilir ki, səfərdə Türkiyə XİN rəhbəri H.Fidan iranlı həmkarı Abbas Əraqçi və başqa yüksək vəzifəli rəsmilərlə bir araya gələcək.

Görüşlərin Yüksək Səviyyəli Əməkdaşlıq Şurasının institusional çərçivəsinin gücləndirilməsinə, şuranın yaxın vaxtlarda keçiriləcək doqquzuncu iclasına hazırlıqların nəzərdən keçirilməsinə və təhlükəsizlik ilə terrorla mübarizə sahəsində əməkdaşlığın dərinləşdirilməsinə yönələcəyi gözlənilir.

Nazir H.Fidan həmçinin ticarət infrastrukturunun sürətləndirilməsini və iki ölkə arasında 30 milyard dollarlıq ikitərəfli ticarət hədəfinə çatmaq üçün atılacaq addımları müzakirə etməsi planlanır. Qeyd edilir ki, ikitərəfli ticarət həcmi 2025-ci ilin oktyabr ayı etibarilə 6,5 milyard dollara çatıb.

Regional sabitlik də gündəmin əsas mövzularından biri olacaq. Rəsmi Ankara Tehran rəhbərliyi ilə Qəzza, Suriya, İsrailin bölgədəki fəaliyyəti və İranın nüvə proqramına sülh yolu ilə həll tapılması məsələlərində dialoqun əhəmiyyətini vurğulayacaq.

Görüşlər həmçinin Rusiya–Ukrayna müharibəsi, Cənubi Qafqazdakı proseslər və Pakistan ilə Əfqanıstan arasındakı gərginliyin azaldılması səylərini də əhatə edəcək.

Xatırladaq ki, Yüksək Səviyyəli Əməkdaşlıq Şurasının son iclası 2024-cü ilin yanvar ayında keçirilmişdi.