Minlərlə israilli Portuqaliya səfirliyinin qarşısında vətəndaşlıq növbəsinə düzülüb
On minlərlə israilli ölkəni tərk edərkən, Portuqaliya vətəndaşlığına maraq da sürətlə artmaqdadır
“Times of Israel” qəzetinin yaydığı xəbərə görə, minlərlə israilli noyabrın 29-da Təl-Əvivdə yerləşən Portuqaliya səfirliyinin önündə uzun növbələr yaradaraq vətəndaşlıq üçün müraciət edib.
Artan maraq səbəbilə səfirlik onlayn növbə sistemindəki sıxlığı azaltmaq məqsədilə xüsusi “köhnə üsulla müraciət” təşkil edib. Bu qəbul günündə iştirak edənlər ya vətəndaşlıq müraciəti edirdi, ya da Portuqaliya pasportlarını yeniləyirdi. Bildirilir ki, növbə səfirliyin girişindən yeraltı avtodayanacağa qədər uzanıb.
İsraillilər niyə Portuqaliya vətəndaşlığı almaq istəyir?
Portuqaliya 2015-ci ildə qəbul edilən qanunla, XVI əsrdə İnkvizisiya dövründə zülmə məruz qalan Səfarad yəhudilərinə vətəndaşlıq müraciəti hüququ tanımışdı. Lakin müraciətlərin çoxalması fonunda Portuqaliya hökuməti 2023-cü ildə qanunun məqsədinə çatdığını bildirərək şərtləri sərtləşdirdi.
Qeyd edək ki, israillilər Portuqaliya vətəndaşlığı sayəsində Avropa İttifaqı ölkələrində sərbəst hərəkət imkanı, daha aşağı yaşayış xərcləri, Avropa universitetlərinə daha rahat qəbul və daha ucuz təhsil haqları kimi üstünlüklər əldə edə bilirlər.
Xüsusilə 2023-cü ilin oktyabrında İsrailin Qəzzaya qarşı müharibəsindən sonra ikinci pasporta tələbat daha da artıb. On minlərlə israilli ölkəni tərk edərkən, Portuqaliya vətəndaşlığına maraq da sürətlə artmaqdadır.