Türkiyənin xarici işlər naziri Hakan Fidan Azərbaycan və Qətərdən olan həmkarları ilə regional inkişafları müzakirə edib. Bu barədə məlumat Türkiyənin Xarici İşlər Naziriliyi tərəfindən verilib.
Bildirilir ki, H.Fidan martın 13-də Qətərin baş naziri və xarici işlər naziri Məhəmməd bin Abdurrahman əl-Tani, eləcə də Azərbaycanın xarici işlər naziri Ceyhun Bayramov ilə ayrı-ayrılıqda telefon danışığı aparıb. Danışıqlar zamanı nazirlər Türkiyəyə doğru atılan raketlərlə bağlı həmrəylik və dəstək mesajlarını da çatdırıblar.
Türkiyə Milli Müdafiə Nazirliyi tərəfindən verilən açıqlamada bildirib ki, İrandan buraxılaraq Türkiyə hava məkanına daxil olan ballistik raket Şərqi Aralıq dənizində yerləşdirilmiş NATO müdafiə sistemləri tərəfindən zərərsizləşdirilib. Bunun ABŞ və İsrailin İrana qarşı başlatdığı müharibə başlayandan bəri baş verən üçüncü belə hadisə olduğu qeyd olunub.
Xəbər verildiyi kimi, İsrail və ABŞ fevralın 28-də İrana qarşı birgə hücum həyata keçiriblər. Hücumlar nəticəsində indiyədək, İranın ali dini lideri olan Əli Xamenei də daxil olmaqla, təxminən 1.300 nəfərin həyatını itirdiyi bildirilir.
Tehran rəhbərliyi isə cavab olaraq İsraili və ABŞ hərbi qüvvələrinin yerləşdiyi İordaniya, İraq və Körfəz ölkələrini hədəf alan PUA və raket zərbələri endirib. Bu hücumlar nəticəsində insan itkiləri qeydə alınıb, həmçinin mülki infrastruktura da ciddi ziyan dəyib.
