İran Səudiyyə Ərəbistanı, Birləşmiş Ərəb Əmirlikləri (BƏƏ), Bəhreyn, Qətər və İordaniyanı, ABŞ və İsrailin onun ərazilərinə qarşı hücumlarında iştirak etməkdə ittiham edərək bu ölkələrdən təzminat tələb edib.

Aprelin 13-də Birləşmiş Millətlər Təşkilatının (BMT) Baş katibi Antonio Quterreş və BMT Təhlükəsizlik Şurasının sədri Camal Fares Əlruvayeyə məktub ünvanlayan İranın BMT-dəki elçisi Əmir Səid İrəvani sözügedən dövlətlərin ABŞ-İsrailin İrana hücumlarına imkan yaradaraq "beynəlxalq öhdəliklərini pozduqlarını" irəli sürüb. İrəvani bu ölkələrin məsuliyyətə cəlb edilmələrinin və müharibə zamanı dəymiş zərərə görə təzminat ödəmələrinin vacibliyini bildirib.

Regional münaqişələr və ağır nəticələr

Regiondakı gərginlik fevralın 28-də ABŞ və İsrailin İrana qarşı təşkil etdiyi birgə hava hücumları ilə pik həddə çatmışdı. Tehran rəhbərliyi isə keçən həftə elan edilən iki həftəlik atəşkəsdən əvvəl İsrail, İraq, İordaniya və ABŞ hərbi qüvvələrinə ev sahibliyi edən Körfəz ölkələrinə hücumlar təşkil edərək cavab vermişdi. Region miqyasında baş verən bu qarşıdurmalarda minlərlə insan həyatını itirib və yaralanıb.

Diplomatik səylərdən nəticə alınmadı

Diplomatik cəbhədə isə İran və ABŞ nümayəndə heyətləri aprelin 12-də səhər saatlarında Pakistanın paytaxtı İslamabadda 21 saat davam edən görüşlərini yekunlaşdırıblar. Lakin tərəflərin heç bir razılığa gələ bilmədiyi bildirilir.