HAVELSAN şirkətinin müdafiə sahəsindəki mühüm proqram təminatı həllərindən biri olan Hərbi Hava Qüvvələrinin Məlumat Sistemi (HvBS) çərçivəsində hazırlanmış kritik imkanların bir hissəsi Azərbaycan Hərbi Hava Qüvvələri Komandanlığının envanterinə uğurla təhvil verilib.
Türkiyə Hərbi Hava Qüvvələri Komandanlığının operativ ehtiyacları istiqamətində hazırlanan HvBS hava əməliyyatlarının planlaşdırılması, icrası, izlənilməsi və qiymətləndirilməsi proseslərini rəqəmsal mühitdə inteqrasiyalı şəkildə idarə etməyə imkan verir. Sistem inkişaf etdirilmiş komanda-idarəetmə infrastrukturu təqdim edir.
Azərbaycan Hərbi Hava Qüvvələri Komandanlığına təhvil verilən sistem əməliyyat mərkəzlərində işləyən heyətin vahid əməliyyat görüntüsü üzərindən fəaliyyət göstərməsini təmin edir. Eyni zamanda tapşırıq və əməliyyat məlumatlarının real vaxt rejimində idarə olunmasına şərait yaradır. Bununla yanaşı, kritik operativ məlumatların tək mərkəzdən izlənilməsinə və qərarqəbuletmə proseslərinin sürətləndirilməsinə kömək edir. Beləliklə, planlaşdırma, koordinasiya və icra proseslərində sürət, dəqiqlik və səmərəlilik əhəmiyyətli dərəcədə artırılır.
Əməliyyat hazırlığını dəqiqələrə endirir
Bütün bu komponentləri vahid bir sistemdə cəmləşdirən HvBS dünyanın ən genişmiqyaslı hərbi hava qüvvələri məlumat sistemlərindən biri kimi diqqət çəkir. Bu sistem əməliyyat hazırlığı proseslərini dəqiqələrə endirir və hava əməliyyatlarında mühüm manevr qabiliyyəti qazandırır.
Modullar müxtəlif komandanlıq pillələri arasında təhlükəsiz məlumat mübadiləsini dəstəkləyir. Onlar hava əməliyyatına dair kritik məlumatların eyni vaxtda ekranda görünməsinə və operativ əməliyyatların anlıq dəyişikliklərə uyğun idarə olunmasına imkan verir. Açıq və modulyar quruluşu sayəsində mövcud komanda-idarəetmə infrastrukturları ilə inteqrasiyalı şəkildə işləyə bilən sistem, istifadəçilərin ehtiyaclarına uyğun olaraq genişləndirilə bilən quruluşu ilə də seçilir.
HAVELSAN yerli və milli imkanlarla inkişaf etdirib
Həyata keçirilən təhvil prosesi Türkiyə ilə Azərbaycan arasında müdafiə sənayesi əməkdaşlığının proqram təminatı və komanda-idarəetmə texnologiyaları sahəsində çatdığı səviyyəni göstərmək baxımından kritik əhəmiyyət kəsb edir.
Eyni zamanda HAVELSAN-ın milli imkanlarla hazırladığı əməliyyat idarəetmə proqramlarının beynəlxalq istifadəçilər tərəfindən seçilməsi Türkiyənin müdafiə informatikası və komanda-idarəetmə sistemləri sahəsindəki mühəndislik imkanlarının bariz göstəricisidir.
Türkiyə mühəndisliyi ilə hazırlanan HvBS-nin beynəlxalq istifadəçilər tərəfindən tələb görməsi Türkiyənin komanda-idarəetmə sistemləri, tapşırıq idarəetmə proqramları və müdafiə informatikası sahəsindəki mühəndislik bacarığının beynəlxalq miqyasda qəbul edildiyini ortaya qoyur.
