Ukraynanın yüksək vəzifəli rəsmisi noyabrın 28-də AFP-yə bildirib ki, Ukrayna danışıqlar heyətinin bu həftəsonu ABŞ-ın Ukraynadakı müharibəyə son qoymaq planını müzakirə etmək üçün Vaşinqtonda səfərdə olacağı planlaşdırılır.

Məsələnin həssaslığı səbəbilə adının açıqlanmasını istəməyən mənbə deyib: “Heyətin bu həftənin sonunda Amerika tərəfi ilə görüşü planlaşdırılır”.

“Bloomberg News”un məlumatına görə, heyətdə Ukrayna tərəfindən Milli Təhlükəsizlik və Müdafiə Şurasının katibi Rustem Umerov və Xarici İşlər Nazirliyinin birinci müavini Sergey Kislitsa yer alacaq. Amerika tərəfindən isə ABŞ prezidentinin Yaxın Şərq üzrə xüsusi nümayəndəsi Stiv Vitkoff və Ağ Evin keçmiş müşaviri Cared Kuşnerin olacağı ehtimal edilir.

Bundan əlavə, tərəflər arası görüşün Florida ştatında keçirilə biləcəyi qeyd olunub.

Ukrayna rəsmisi əlavə edib ki, Ukrayna prezidenti Volodimir Zelenskinin keçmiş baş müşaviri Andrey Yermakın da əvvəlcə danışıqlarda iştirak etməsi planlaşdırılsa da, o, noyabrın 28-də vəzifədən azad edildiyini açıqlayıb.