Qəzzada bir məktəb-sığınacaqda məskunlaşmış mülki şəxslər mayın 26-da İsrailin hava hücumu zamanı yuxuda idilər. Hücum nəticəsində bina alovlara büründü.
Yerli səhiyyə orqanlarının məlumatına görə, Fahmi Cirhavi məktəbinə edilən hücumda təxminən 31 fələstinli, o cümlədən 18 uşaq və 6 qadın yanaraq həyatını itirib, onlarla adam yaralanıb.
“Yanğın uşaqlar və qadınlar içəridə yatarkən başladı. Alovlar onları cəsədə çevirdi və məhv etdi”, - deyə Qəzzanin şimalında Təcili Yardım Xidmətinin direktoru Fares Afaneh video açıqlamasında bildirib: “Uşaqlar və qadınlar yanan sinif otaqlarında qışqırırdılar. Yanğın böyük olduğundan biz onları xilas edə bilmədik. Mənzərə çox dəhşətliydi. Onun şiddətini təsvir etmək mümkün deyil.”
Dəhşətli səhnələr
Hücumdan sağ çıxan gənc Yusif Kaseh partlayışın İsrail raketlərinin məktəbi vurduğu zaman baş verdiyini dedi: “Bir neçə saniyə ərzində alov hər şeyi məhv etdi. İnsanlar dəmir pəncərə barmaqlıqları çöldən qırmağa çalışdılar, lakin alət çatışmazlığı və həddindən artıq istildən mümkün olmadı. Saatlarla davam edən səylərdən sonra mülki müdafiə qrupları yanğını söndürə bildilər. Qurtara biləcəyimizi xilas etdik. Amma mənzərə çox ağır və dəhşətliydi. Yanan cəsədlərin qalıqları divarlara və döşəmələrə yapışmışdı.”
Əbu İbrahim adlı başqa bir sağ qalan qaralmış divarların arasında oturaraq qəzəb dolu baxışlarla bunları söylədi: “Biz bu torpağın əsl sahibləriyik. Nə etdik ki, qadınlarımızın və uşaqlarımızın yanaraq öldürüldü? Biz torpaq oğurlamadıq, heç kimi çıxarmadıq. Bu, bizim torpağımızdır. Hamımızı öldürsələr belə, buradan getməyəcəyik.”
İsrailin qırğını
İsrail indiyə qədər blokadada olan ərazidə əsasən qadınlar və uşaqlar olmaqla təxminən 54.000 fələstinlini öldürüb, əhalinin əksəriyyəti köç edib, mühasirədə olan Qəzzanın böyük hissəsi xarabalığa çevirib.
Təl-Əviv həmçinin ərzaq, su, dərman və digər təcili humanitar yardımların daxil olmasını bloklayaraq fələstinliləri aclıqdan ölməyə məhkum edib.
2024-cü ilin noyabr ayında Beynəlxalq Cinayət Məhkəməsi Baş nazir Benyamin Netanyahu və onun keçmiş Müdafiə naziri Yoav Qallant üçün Qəzzadakı “müharibə cinayətləri” və “insanlığa qarşı cinayətlər”ə görə həbs qərarı çıxardı. İsrail həmçinin anklavdakı mülki şəxslərə qarşı müharibə cinayətləri ilə bağlı Beynəlxalq Ədalət Məhkəməsində soyqırım işi ilə qarşı-qarşıya qalıb.
