Vitkoffun danışıqların yenidən başlaması təklifindən sonra İranın baş nüvə müzakirəçisi "Financial Times" qəzetinə bildirib ki, ABŞ İrana həqiqi etimadı artıran tədbirlərlə gəlməlidir.
"Financial Times" İranın xarici işlər nazirinə istinadən yazıb ki, ABŞ keçən ayki müharibə zamanı İrana vurduğu ziyana görə təzminat ödəməyə razı olmalıdır.
İranın xarici işlər naziri Abbas Əraqçi Tehranda "Financial Times" qəzetinə verdiyi müsahibədə "Onlar danışıqların ortasında bizə niyə hücum etdiklərini izah etməli və gələcək danışıqlarda bunun bir daha baş verməyəcəyinə dair zəmanət verməlidirlər" deyib. O əlavə edib ki, onlar (İrana) vurduqları zərərin əvəzini ödəməlidirlər.
Xəbərdə Əraqçi ilə ABŞ-ın xüsusi nümayəndəsi Steve Vitkoff arasında müharibə zamanı və müharibədən sonra mesaj mübadiləsi aparıldığı bildirilib. İran rəsmisi amerikalı həmkarına İranın nüvə proqramı ilə bağlı uzun müddətdir davam edən çıxılmaz vəziyyətə son qoymaq üçün “qazan-qazan” həllinin vacibliyini vurğulayıb.
"Financial Times"ın məlumatına görə, İranın baş nüvə müzakirəçisi bura maliyyə təzminatı və danışıqlar zamanı İrana bir daha hücum olunmayacağına dair təminat da daxil edilməli olduğunu deyib, lakin əlavə təfərrüatlar açıqlamayıb.
ABŞ keçən ay Vaşintonun nüvə silahı hazırlama proqramının hissəsi olduğunu iddia etdiyi İranın nüvə obyektlərinə hücumlar həyata keçirib.
Tehran isə nüvə proqramının dinc məqsədlərə yönəldiyini və silah istehsal etmədiyini iddia edir.
Ağ Ev və ABŞ Dövlət Departamenti "Reuters"in mövzuya dair şərh tələbinə cavab verməyib.
