Türkiyə Əməkdaşlıq və Koordinasiya Agentliyi (TİKA) tərəfindən hazırlanan humanitar yardım bağlamaları Türkiyənin Venesueladakı səfirliyinin koordinasiyası ilə ölkə rəsmilərinə təhvil verilib. Təhvil-təslim prosesi zəlzələdən ən çox zərər çəkən La Quayra şəhərindəki "Xose Mariya Varqas" İdman Kompleksində baş tutub.
Təxminən 5 min nəfərə çatdırılması nəzərdə tutulan yardım bağlamalarında gigiyenik ləvazimatlar yer alıb. Bununla yanaşı, bağlamalara beş nəfərlik bir ailənin 15 günlük ehtiyacını qarşılayacaq yağ, düyü, makaron və peçenye kimi əsas qida məhsulları da daxil edilib.
Türkiyənin Karakasdakı səfiri Naci Aydan Karamanoğlu Türkiyə dövlətinin zəlzələdən sonra Venesuela ilə həmrəyliyini təkcə mesajlarla məhdudlaşdırmadığını və 75 nəfərlik türkiyəli xilasetmə qrupunun bölgədə fəaliyyətini davam etdirdiyini qeyd edib. O, Venesuelanın 6 fevral zəlzələsində Türkiyəyə göstərdiyi dəstəyi xatırladıb. N.A.Karamanoğlu TİKA, Fövqəladə Halların İdarə Olunması Agentliyi (AFAD) və Türkiyə Qızıl Ayparası tərəfindən humanitar yardımların davam etdiriləcəyini vurğulayıb.
Venesuela xarici işlər nazirinin müavini Oliver Blanko isə Türkiyəyə təşəkkür edib. O, Türkiyə dövlətinin zəlzələnin dərhal ardından bölgəyə xilasetmə qrupu göndərdiyini bildirib. O.Blanko türkiyəli xilasetmə qruplarının bölgədə ümid olmağa davam etdiyini söyləyib. Nazir müavini Venesuelanın çətin şəraitdə Türkiyə xalqının uzatdığı yardım əlini unutmayacaqlarını xüsusi vurğulayıb.
La Quayra şəhərinin valisi Xose Alexandro Teran da beynəlxalq həmrəyliyə görə minnətdarlığını bildirib. Vali xilasetmə qruplarının ən kritik dəstəyi təmin etdiyini və dağıntılar altından sağ çıxarılanların ümid verməyə davam etdiyini qeyd edib. X.A.Teran: “Həqiqi dostluq belə çətin məqamlarda bəlli olur”, – deyə əlavə edib.
