Kuba hökuməti Vaşinqtonun “genişmiqyaslı hücum” adlandırdığı və Venesuela prezidenti Nikolas Maduronun saxlanılması ilə nəticələnən hərbi əməliyyat zamanı 32 kubalı döyüşçünün həlak olduğunu açıqlayıb. Kuba Prezidenti Migel Dias-Kanel yanvarın 4-də verdiyi bəyanatda bildirib ki, vəzifələrini şərəflə yerinə yetirən və “sərt müqavimət” göstərən döyüşçülərin xatirəsini yad etmək üçün yanvarın 5-i və 6-sı ölkədə milli matəm günləri elan olunacaq. Hökumətin məlumatına görə, həlak olanlar ikitərəfli əməkdaşlıq çərçivəsində Venesuela hakimiyyətinin xahişi ilə bu ölkəyə göndərilmiş Kuba İnqilabi Silahlı Qüvvələrinin və Daxili İşlər Nazirliyinin nümayəndələridir.
Venesuela tərəfi də həlak olan 32 kubalı döyüşçünün xatirəsini böyük ehtiramla yad etdiyini bəyan edib. Bundan əvvəl ABŞ Prezidenti Donald Tramp əməliyyat zamanı Maduronu qorumağa cavabdeh olan çoxsaylı Kuba təhlükəsizlik əməkdaşlarının öldürüldüyünü qeyd etmişdi. Hazırda Nikolas Maduro və həyat yoldaşı Siliya Flores Nyu-Yorkun Bruklin bölgəsində yerləşən Metropolitan Həbs Mərkəzindədirlər.
ABŞ rəsmiləri cütlüyün narkotik qaçaqmalçılığı və terror qruplaşmaları ilə əməkdaşlıq ittihamları əsasında mühakimə olunacağını bildiriblər. Nikolas Maduro bu ittihamları rədd edir. Venesuela rəsmiləri isə keçirilən hərbi əməliyyatı qanunsuz və ölkənin suverenliyinin pozulması kimi qiymətləndirərək Maduronun həyat yoldaşı ilə birlikdə dərhal azad edilməsini tələb edirlər.
