Səudiyyə Ərəbistanı Ciddədə Körfəz Əməkdaşlıq Şurasının növbədənkənar iclasına ev sahibliyi edir. Bu, iki ay əvvəl Körfəz ölkələrinin İran müharibəsinin cəbhə xəttinə çevrilməsindən bəri liderlərin ilk üz-üzə görüşüdür.
Körfəz ölkələrindən adının açıqlanmasını istəməyən bir rəsmi bildirib ki, toplantının məqsədi ABŞ və İsrailin 28 fevralda İrana qarşı hücumlarla müharibəni başlatmasından bəri Körfəz ölkələrini hədəf alan minlərlə İran raketi və PUA hücumuna qarşı birgə cavab hazırlamaqdır.
Müharibə altı KƏŞ ölkəsinin hamısında mühüm enerji infrastrukturunun zədələnməsinə səbəb olu. ABŞ ilə əlaqəli şirkətlər və digər mülki infrastruktur obyektləri ilə yanaşı hərbi obyektlər də hədəf alınıb.
ABŞ və İranın 8 apreldə atəşkəs elan etməsindən bəri hücumlar azalıb, lakin Körfəz ölkələrinin paytaxtları münaqişənin yenidən başlamasından narahatdırlar. ABŞ və İran arasında müharibəni qalıcı olaraq dayandıracaq saziş üzrə danışıqlar isə hələlik nəticə verməyib.
Aidiyyatı ölkələrin rəsmi xəbər agentlikləri Qətər Əmiri, Küveyt Vəliəhd Şahzadəsi və Bəhreyn Kralının sammitdə iştirak edəcəyini bildirib. Şuranın mərkəzi qərargahına ev sahibliyi edən Səudiyyə Ərəbistanı ilə yanaşı, digər üzvlər olan Oman və Birləşmiş Ərəb Əmirliklərini kimin təmsil edəcəyi isə hələlik qeyri-müəyyən olaraq qalır.
“Reaksiyalar kifayətsizdir”
Körfəz Əməkdaşlıq Şurası müharibə qarşısında kifayət qədər reaksiya vermədiyi səbəbilə Birləşmiş Ərəb Əmirlikləri (BƏƏ) tərəfindən tənqid olunub.
BƏƏ-nin yüksək rütbəli rəsmisi Anvar Qərqaş aprelin 27-də BƏƏ-də keçirilən konfransda belə deyib: "Logistik cəhətdən KƏŞ ölkələrinin bir-birlərinə dəstək olduqları doğrudur, lakin siyasi və hərbi baxımdan düşünürəm ki, mövqeləri tarixin ən zəif nöqtəsində idi. Ərəb Liqasından belə zəif mövqe gözləyirdim və yanılmadım, lakin KƏŞ-dən gözləmirdim və buna təəccüblənirəm".
Bu açıqlamalar BƏƏ-nin İranın minlərlə raket və PUA hücumuna qarşı kifayətsiz hesab etdiyi kollektiv siyasi və hərbi cavabla bağlı şura daxilində artan narazılığını əks etdirir. Həmin hücumlar altı üzv dövlətin hamısında enerji infrastrukturu və mülki obyektlərə ciddi zərər vurub.
