Türkiyə Prezidenti Administrasiyasının İctimaiyyətlə Əlaqələr Departamentinin rəhbəri Fahrettin Altun İsrailin Qəzzada həyata keçirdiyi son hava hücumlarında 5 yardım işçisinin həyatını itirməsi, 2 nəfərin isə ağır yaralanması ilə bağlı Humanitar Yardım Vəqfinə (İHH) başsağlığı mesajı göndərib.

Mayın 29-da "X" platformasında paylaşılan açıqlamada Fahrettin Altun bildirib ki, gənc, qoca, uşaq, qadın fərqi qoymadan soyqırım dərəcəsində terror əsdirən İsrail hökuməti indi də həyatlarını riskə ataraq zəruri yardımları çatdırmaq üçün cəhd göstərən yardım işçilərini hədəf alır.

Fahrettin Altun bəşəriyyəti “bu vəhşiliyə” qarşı daha ucadan səs çıxarmağa və daha konkret addımlar atmağa çağırıb. Altun Türkiyə olaraq axıdılan günahsız insanların qannın qarşısını almaq üçün beynəlxalq ictimaiyyətdə bütün imkanları ilə çalışmağa davam edəcəklərini, vəhşi İsrail terroruna görə məsuliyyət daşıyan qatillərin gec-tez beynəlxalq hüquq qarşısında cavab verməsi üçün səylərin artırılaraq davam etdiriləcəyini bildirib.

Yardım çatdırmaq üçün həyatlarını riskə atırlar

Birləşmiş Millətlər Təşkilatının Ümumdünya Ərzaq Proqramı (WFP) ilə koordinasiyalı olaraq Qəzzada fəaliyyət göstərən İHH İsrailin davam edən hərbi hücumları zamanı Qəzzada qapalı qalan mülki insanlara ərzaq və ləvazimatların çatdırılması üçün yardım işçilərinin iştirak etdiyini bildirib.

İHH-dən verilən açıqlamada, “Hər gün həyatlarını rikə atıb Qəzzanın məzlum xalqına yardım çatdırmağa çalışan humanitar işçiləri hədəf alan bu mənfur hücumu qınayırıq” deyilib.

Hücumlarda həyatını itirən yardım işçilərinin Məhəmməd əl-Mübeyid, Əhməd Bustan, Mutaz Rəcəb, İshaq əl-Tayf və Camal əl-Mübeyid olduğu açıqlanıb.