Türkiyə Böyük Millət Məclisinin (TBMM) sədri Numan Kurtulmuş Suriyadakı son prosesləri və ölkənin gələcək modelini qiymətləndirib. Kurtulmuş Suriyanın ərazi bütövlüyünün və milli suverenliyinin qorunmasının vacibliyini vurğulayıb.

TBMM sədri bildirib ki, Suriyada bütün cəmiyyət təbəqələrini əhatə edən iştirakçı bir sistemin qurulması regionda sabitliyin əsas şərtidir. O, ədalətli təmsilçiliyə əsaslanan demokratik Suriyanın "bölgənin təhlükəsizlik qarantı" olacağını qeyd edib. Kurtulmuşun sözlərinə görə, Türkiyə ölkədəki inteqrasiya addımlarını yaxından izləyir və əldə olunan irəliləyişləri yüksək qiymətləndirir.

Numan Kurtulmuş Suriya hökuməti ilə YPG terror təşkilatı arasında 30 yanvar və 10 mart 2025-ci il tarixlərində imzalanan sazişlərin əhəmiyyətinə diqqət çəkib. O, bu müqavilələrin şərtlərinə tam riayət olunmasının sülhə gedən yolda həlledici olduğunu bildirib. ‘‘Hərbi və inzibati baxımdan mərhələli inteqrasiyanı hədəfləyən bu sazişlər regional sülh üçün dəyərli bir fürsətdir. Bu proses Suriyanın dövlət potensialını artıracaq və yeni təhlükəsizlik arxitekturasına qapı açacaq’’,-deyə Numan Kurtulmuş vurğulayıb.

Parçalanmanın və proksi strukturların heç kimə sülh gətirmədiyini vurğulayan Numan Kurtulmuş hər bir Suriya vətəndaşının kimliyindən və inancından asılı olmayaraq sistemdə "şərəfli və təhlükəsiz" yer almalı olduğunu vurğulayıb.

‘‘Suriya suriyalılarındır’’ deyən Numan Kurtulmuş bildirib ki, Türkiyə Suriyanın yenidən qurulması, dövlət qurumlarının gücləndirilməsi, sərhəd təhlükəsizliyinin təmini və terrorla mübarizə sahələrində hər cür dəstəyi verməyə hazırdır.