Qəzza mülki müdafiə təşkilatı Fələstin ərazilərində yerləşən Xan Yunisdə aprelin 20-də gecə radələrində təşkil edilən İsrail hücumunda üç nəfərin öldüyünü və hücumdan sonra İsrail döyüş təyyarələrinin bölgə üzərində uçduğunun müşahidə edildiyini açıqlayıb.
10 oktyabrdakı atəşkəsə baxmayaraq, Qəzza hələ də İsrail ordusunun gündəlik zorakılıq aktları ilə sarsılmağa davam edir.
Qəzza mülki müdafiə təşkilatının sözçüsü Mahmud Bassal verdiyi açıqlamada deyib: "Qəzzanın cənubunda yerləşən Xan Yunisin şimal-qərbində, Əl-Amal məhəlləsindəki Əl-Zaqzuq qovşağı yaxınlığında gecə yarısı baş verən İsrail hücumu nəticəsində üç nəfər həyatını itirdi".
Yerli xəbərlər ölənlər arasında aprelin 20-də nişanlanan Dərviş əl-Attalın da olduğunu təsdiqləyib.
Şəhərin şimal-qərbində baş verən hücumda çox sayda insan da yaralanıb.
Atəşkəs pozuntuları
Bu yeni insan itkiləri oktyabr ayından bəri Fələstin ərazilərində qüvvədə olan atəşkəs razılaşmasının İsrail tərəfindən davam edən pozuntularının son nümunəsi olub.
Qəzza Hökumətinin Media Ofisi verdiyi açıqlamada İsrailin indiyə qədər atəşkəs razılaşmasını qətllər, həbslər, davam edən mühasirə və aclığa tərk etmə kimi əməllər də daxil olmaqla 2 400 dəfə pozduğunu bildirib.
Qəzza Səhiyyə Nazirliyinə görə, davam edən pozuntular 770-dən çox fələstinlinin ölümünə və 2 171 nəfərin yaralanmasına səbəb olub.
Atəşkəs İsrailin 2023-cü ilin oktyabrında başlayan və 72 mindən çox fələstinlinin ölümünə, 172 mindən çox insanın isə yaralanmasına səbəb olan soyqırım müharibəsindən sonra əldə edilib.
Ölümcül hücumlar eyni zamanda genişmiqyaslı dağıntılara səbəb olaraq, Qəzza infrastrukturunun 90 faizinə zərər vurub.
