İndoneziyanın Yava adasında internat tipli məktəbin uçması nəticəsində ölənlərin sayı 54-ə çatıb.
Səlahiyyətlilər dağıntılar altında qalan ondan çox şəxsin axtarışlarının davam etdiyini bildirir.

Milli Axtarış və Xilasetmə Agentliyinin (Basarnas) əməliyyatlar üzrə direktoru Yudhi Bramantyo jurnalistlərə açıqlamasında deyib ki, bu vaxta qədər 54 nəfər dağıntılar altından çıxarılıb.

“Ümid edirik ki, xilasetmə işlərini bu gün başa çatdıraraq cəsədləri ailələrinə təhvil verəcəyik,” – deyə Y. Bramantyo qeyd edib.

Hadisə tələbələr günorta namazına toplaşarkən baş verib. Məlumata görə, çoxmərtəbəli binanın bir hissəsi qəfil uçub.

Milli Fəlakət Agentliyinin (BNPB) direktor müavini Budi İravan bildirib ki, xilasetmə qrupları hadisə yerində fasiləsiz çalışır və ən azı 13 nəfər hələ də itkin hesab olunur.
Səlahiyyətlilər faktla bağlı araşdırma aparır. İlkin məlumatlara görə, hadisəyə səbəb tikinti zamanı istifadə olunan keyfiyyətsiz materiallar olub. Zəif tikinti standartları və qeyri-adekvat yoxlamalar İndoneziyada ümumi problemdir.

İtkin düşənlərin ailələri, sağ qalmaq üçün nəzərdə tutulmuş 72 saatlıq “qızıl dövr”ün bitməsindən sonra ağır texnikanın istifadəsinə icazə veriblər.

Keçən ay Qərbi Yavada oxşar bir hadisə baş verib. Dua məclisinə ev sahibliyi edən bina uçub, nəticədə 3 nəfər həlak olub, onlarla insan yaralanıb. Bu, ölkədə tikinti təhlükəsizliyi məsələləri ilə bağlı narahatlıqları yenidən gündəmə gətirib.