Kremlin sözçüsü Dmitri Peskov Ukrayna prezidenti Volodimir Zelenskinin Rusiya prezidenti Vladimir Putinlə görüşmək niyyətində olacağı təqdirdə Moskvaya gələ biləcəyini bəyan edib. Rusiyanın V.Zelenski ilə görüşmək üçün dəfələrlə təkliflər irəli sürdüyünü xatırladan D.Peskov Kiyev rejiminin mövzunun nədən ibarət olduğunu çox yaxşı bildiyini qeyd edib. O, Zelenskinin məsuliyyətli və ciddi danışıqlara hazır olacağı təqdirdə Moskvada qəbul ediləcəyini vurğulayıb. Sözçü hazırda Moskva ilə Kiyev arasında heç bir rəsmi əlaqə kanalının mövcud olmadığını diqqətə çatdırıb.

Rusiya prezidenti Vladimir Putinin Fransada keçiriləcək G7 sammitinə dəvət alıb-almadığı ilə bağlı suala cavab verən D.Peskov belə bir dəvətin daxil olmadığını qəti şəkildə bildirib.

Kremlin sözçüsü ABŞ prezidenti Donald Trampın Yaxın Şərq üzrə xüsusi nümayəndəsi Stiv Vitkov və kürəkəni Cared Kuşnerin Rusiyaya planlaşdırılan mümkün səfəri barədə də danışıb. O, sözügedən səfərlə bağlı hələlik heç bir dəqiq tarixin müəyyənləşdirilmədiyini qeyd edib.