Türkiyənin xarici işlər naziri Hakan Fidan rusiyalı həmkarı Sergey Lavrov və səudiyyəli həmkarı Feysəl bin Fərhan Əl Səudla ayrı-ayrılıqda telefon danışığı aparıb. Diplomatik mənbələrin verdiyi məlumata görə, tərəflər ABŞ və İsrailin hərbi əməliyyatları nəticəsində İranda yaranmış gərginliyin aradan qaldırılması və müharibənin dayandırılması istiqamətindəki səyləri müzakirə ediblər.
Xatırladaq ki, Pakistanın vasitəçiliyi ilə aprelin 8-də əldə olunmuş iki həftəlik atəşkəs razılaşmasından sonra ötən həftəsonu İslamabadda ABŞ və İran nümayəndələri arasında danışıqlar keçirilib. Lakin iki ölkə arasında baş tutan yüksək səviyyəli təmaslardan hər hansı bir nəticə əldə olunmayıb.
ABŞ Prezidenti Donald Trump bazar ertəsi günü Türkiyə vaxtı ilə saat 17:00-dan etibarən İran limanlarının tam blokadaya alınması barədə qərar verib. Qərar artıq qüvvəyə minib və bölgədə gərginliyin daha da artmasına səbəb olub.
