Türkiyədə 1993-cü ildə Almaniyanın Solingen şəhərində törədilən irqçi yanğında həyatını itirən 5 türk ailə üzvü yad edilib.

Türkiyə Xarici İşlər Nazirliyinin mayın 28-də verdiyi açıqlamada "32 il əvvəl Solingendə irqçi hücumda həyatını itirən beş vətəndaşımızın xatirəsini ehtiramla yad edirik" deyilib.

Nazirlik ayrıca hücumda iki qızı, iki nəvəsi və bir qardaşı oğlunu itirən, lakin daha sonra sülh və mötədillik çağırışları ilə Almaniyada sülhün simvoluna çevrilən Mevlüde Genci də hörmətlə yad edib. 2022-ci ildə vəfat edən Mevlüde Genc Almaniyada “Bilgə ana” adıyla xatırlanır.

Xarici İşlər Nazirliyi də açıqlamasında "Bu münasibətlə Mevlüde Gencin əziz xatirəsini bir daha hörmət və minnətdarlıqla yad edirik" ifadəsini işlədib.

İrqçilik və İslamofobiyaya qarşı mübarizə

Açıqlamada Türkiyənin “artan irqçilik, ksenofobiya və İslamofobiya ilə hər platformada mübarizə aparmağa davam edəcəyi” vurğulanıb.

Xatırladaq ki, 1993-cü il mayın 29-da Şimali Reyn-Vestfaliya əyalətinin Solingen şəhərində yaşayan türk əsilli Genç ailəsinin evini 16-23 yaş arasında olan 4 ifrat sağçı alman gənc yandırıb. Hücum nəticəsində 5 nəfər həyatını itirib, 14 nəfər yaralanıb.

Hücum edənlərdən üçü 10 il, dördüncü şəxs isə 15 il həbs cəzasına məhkum edilib.

Hücum Almaniyanı dərindən sarsıtdı, beynəlxalq qınaqlara səbəb oldu və ölkədə irqçilik və inteqrasiya ilə bağlı müzakirələrə gətirib çıxardı.