İsrail Baş naziri Benyamin Netanyahu İrana qarşı hədələyici bəyanatla çıxış edərək, növbəti dövrdə əsas hədəflərinin Tehran rejimini devirmək olduğunu bildirib.

İsrail Nazirlər Kabinetindən verilən açıqlamaya görə, B.Netanyahu Təl-Əvivdə müdafiə naziri İsrael Katz, Baş Qərargah rəisi Eyal Zamir və digər rəsmilərlə görüşüb.

Görüşdəki çıxışında İran təhdidinin qarşısını aldıqlarını iddia edən B.Netanyahu Tehran rejiminin "hər zamankından daha zəif və çarəsiz" vəziyyətdə olduğunu irəli sürüb. O, "Qarşıda duran əsas vəzifə İran rejimini devirməkdir’’ deyərək bu hədəfin tamamilə real və əlçatan olduğunu vurğulayıb.

B.Netanyahu həmçinin İranın İsrailə hücum edə bilməməsini ölkəsinin adekvat cavabı ilə əlaqələndirib.

Qeyd edək ki, İsraildə oktyabrın 27-də keçiriləcək seçkilərdən əvvəl aparılan son sorğular keçmiş Baş Qərargah rəisi Qadi Eyzenkotun rəhbərlik etdiyi "Yaşar" partiyasının yarışda liderlik etdiyini göstərir.