Fransa prezidenti Emmanuel Makron deyib ki, ABŞ prezidenti Donald Tramp və Rusiya prezidenti Vladimir Putin Budapeştdə görüşərsə, ukraynalılar və avropalılar masa ətrafında olmalıdırlar.

Sloveniyada keçirilən Aİ-nin Aralıq dənizi sammitindən sonra danışan Makron Trampla Putin arasında keçirilməsi ehtimal olunan görüşü müsbət olaraq qiymətləndirib, lakin Ukrayna və Avropa təhlükəsizliyi ilə bağlı qərarlardan təsirlənənlərin görüşə daxil edilməsinin vacibliyini vurğulayıb.

Makron Fransanın Ukraynaya “güclü və davamlı” dəstəyini bir daha təsdiqləyərək, istənilən sülhün beynəlxalq hüquqa uyğun olmasının lazım gəldiyini qeyd edib.

London yığıncağı

Makron həmçinin yardım və əməkdaşlığı inkişaf etdirmək üçün Londonda prezident Volodimir Zelenski ilə “könüllülər koalisiyası” görüşünün keçiriləcəyini açıqlayıb.

Ukrayna ilə bağlı istənilən sülhün beynəlxalq hüquqa uyğun olaraq “güclü və davamlı” olması və uzunmüddətli sabitliyin vacibliyini vurğulayan Makron əlavə edib: “Başqa (sülh) yoxdur. Avropalılar isə bu barədə həmişə aydın olublar”.

Qeyd edək ki, ötən həftə Tramp Zelenskini Rusiya ilə razılığa gəlməyə çağırıb və deyib ki, hər iki tərəf hazırkı cəbhə xəttində münaqişəni dayandırmalıdır.

Zelenski isə Ukraynanın Moskvaya heç bir güzəşt etməyəcəyini bir daha vurğulayıb.

Oktyabrın 16-da baş tutan telefon danışığında Putin və Tramp növbəti təkbətək görüşün mümkünlüyünü müzakirə edib və hər iki tərəfin nümayəndələrinin dərhal sammitə hazırlığa başlaması barədə razılığa gəliblər. Budapeşt iki liderin görüşünün mümkün yeri kimi nəzərdən keçirilir.