“TRT World”un müstəqil jurnalisti Yahya Barzaq Qəzzanın mərkəzi Deir əl-Bəlah bölgəsində İsrailin həyata keçirdiyi hava hücumu nəticəsində həyatını itirib.
Y.Barzaq İsrailin Qəzzaya hücumunun mülki əhali üzərindəki təsirlərini sənədləşdirərkən, bir kafedə çəkdiyi görüntüləri yüklədiyi anda İsrailin hava zərbəsinə tuş gəlib. Fələstin mediasının məlumatına görə, həmin hücumda Y.Barzaqla birlikdə beş nəfər də həlak olub.
Səhiyyə rəsmiləri bildirib ki, sentyabrın 30-da Qəzzada həyata keçirilən yeni İsrail hücumlarında hamilə bir qadın və bir uşağın da daxil olduğu ən azı 58 fələstinli öldürülüb. Fələstin mənbələri əlavə edib ki, Deir əl-Bəlaha endirilən hava zərbəsi bir dülgər emalatxanasını da hədəf alıb.
Jurnalist Y.Barzaq sosial media platforması “Instagram”dakı son paylaşımında, İsrail bombardmanı və məcburi köçürülmə səbəbindən Qəzza şəhərindən cənuba qaçmaq məcburiyyətində qaldığını bildirmişdi. O, paylaşımında “Bədənim cənuba sürükləndi, amma qəlbim hələ də Qəzza şəhərindədir” ifadəsinə yer vermişdi.
Türkiyənin qınaması
Türkiyə prezidenti administrasiyasının ictimaiyyətlə əlaqələr idarəsinin rəhbəri Burhanəddin Duran jurnalist Y.Barzaqı “işğal və təzyiqin kölgəsində həqiqətin ardınca gedən cəsur bir səs” olaraq xarakterizə edib.
B.Duran açıqlamasında belə deyib: “Onun hekayəsi “TRT World”un (Qəzza fotoşəkillərimdə) adlı sənədli filmində yer almışdı və bütün dünyaya baş verənləri çatdırmaq çabasını göstərirdi. Ancaq bilinməlidir ki, jurnalistlərə qarşı hücumlar həqiqəti heç vaxt susdura bilməyəcək. Yahyaya rəhmət diləyir, ailəsinə, həmkarlarına və sevdiklərinə başsağlığı veririk.”
TRT-nin Baş direktoru Zahid Sobacı da hücumu kəskin qınayıb. O, Y.Barzaqın öldürülməsini Qəzzada jurnalistlərin üzləşdiyi həyati təhlükələri bir daha ortaya qoyduğunu deyib:
“Son dərəcə ağır şərtlər altında xəbər hazırlayan həmkarımız Yahya Barzaqın itkisi bizi dərindən kədərləndirdi. İsrail jurnalistləri hədəf alaraq bəşəriyyətə qarşı törətdiyi cinayətləri gizlədə bilməyəcək və gec-tez hesab verməli olacaq.”
Yahya Barzaq Qəzzada yeni doğulan körpələrin fotoqrafı kimi geniş tanınırdı. Müharibədən əvvəl onun “Instagram” səhifəsi Qəzza şəhərindəki xüsusi studiyasında çəkilmiş və diqqətlə işlənmiş körpə portretləri ilə dolu idi.
İsrailin hücumlarının başlamasından sonra isə səhifəsi dağıntı və ölümün simvoluna çevrilən qara haşiyəli təsirli görüntülərlə dolmuşdu. Həmçinin, o, soyqırım xarakterli müharibədə öldürülən uşaqları xatırladan videolar da paylaşırdı.
Qeyd edək ki, Y.Barzaq 2023-cü il oktyabrın 7-dən bu yana Qəzzada öldürülən təxminən 250 jurnalist və media işçisindən biridir. Bu fakt, müharibəni müasir tarixdə mətbuat işçiləri üçün ən ölümcül münaqişələrdən birinə çevirir.
Fələstin mediası bildirib ki, Y.Barzaqın ölümü İsrailin Qəzzada jurnalistlərin də məqsədli şəkildə hədəf alındığını bir daha açıq şəkildə nümayiş etdirir.
