Türkiyə Prezidenti Rəcəb Tayyib Ərdoğan və İndoneziya Prezidenti Prabovo Subianto arasında telefon danışığı olub. Prezident Ərdoğan martın 19-da baş tutan söhbət zamanı Yaxın Şərqdəki münaqişələrin dərhal dayandırılması üçün çağırış edib. O, İrana edilən hücumlarla başlayan və Körfəz ölkələrinə qədər genişlənən zorakılıq dalğasına ən qısa zamanda son qoyulmasının zəruriliyini vurğulayıb.
Prezident Ərdoğan İsrailin Əl-Əqsa məscidinə yönəlmiş təxribatlarını "qəbuledilməz" adlandıraraq Türkiyənin bu məsələdəki sərt mövqeyini ifadə edib. Türkiyə Prezidenti Administrasiyasının İctimaiyyətlə Əlaqələr İdarəsindən verilən məlumata görə, liderlər həmçinin ikitərəfli münasibətləri, regional və qlobal prosesləri ətraflı müzakirə ediblər. Qeyd olunub ki, İrana qarşı hücumlar və buna verilən cavab tədbirləri regionda gərginliyi kritik həddə çatdıraraq genişmiqyaslı müharibə riskini artırıb.
Diplomatiyanın tərəfdarı olan Türkiyə bütün tərəfləri təxribatlardan uzaq durmağa çağırıb və belə münaqişələrin qlobal təhlükəsizlik üçün ciddi risk yaratdığını bildirib.
Söhbət zamanı işğal altındakı Şərqi Qüdsdə yerləşən dini və mədəni abidələrin qorunmasının vacibliyi bir daha diqqətə çatdırılıb. İslam dünyası üçün müqəddəs sayılan Əl-Əqsa məscidinin statusunun qorunması məsələsi Türkiyənin xarici siyasətində prioritet və həssas mövzu olaraq qalmaqdadır.
