Türkiyə yaşıl və rəqəmsal keçidi sürətləndirmək məqsədilə Yaşıl Uzlaşma Fəaliyyət Planını yeniləyib.
“Resmi Gazete”də dərc olunan məlumatlara görə, Türkiyə qlobal yaşıl təchizat zəncirlərinə inteqrasiyanı gücləndirmək və Aİ Gömrük İttifaqı ilə uyğunluğu artırmaq məqsədilə Yaşıl Uzlaşma Fəaliyyət Planını 2026-2030-cu illər dövrü üçün yeniləyib.
Prezident Rəcəb Tayyib Ərdoğanın imzaladığı beşillik strateji çərçivə təbii resursların səmərəli şəkildə yenidən istifadəsi üçün qlobal tərəfdaşlıqlar qurmağı hədəfləyir.
Bu yenilənmə BMT və Aİ-nin dövrü iqtisadiyyat və sənayedə karbonsuzlaşmanı tənzimləyən siyasətləri işə salması ilə yanaşı, dünya miqyasında yaşıl keçid səylərinin sürət qazandığı bir dövrdə həyata keçirildi. Sənəddə Türkiyənin iklim qanunvericiliyi və karbon qiymətləndirilməsi məsələlərində mühüm irəliləyişlər əldə etdiyi; bununla yanaşı bərpa olunan enerji gücünü artırdığı, dövrü iqtisadiyyata keçdiyi və davamlı istehsal təcrübələrini təşviq etdiyi qeyd olunur.
Yeni çərçivə yaşıl və rəqəmsal transformasiyaları eyni zamanda işə daxil edən "qoşa transformasiya" yanaşmasını mənimsəyir. Ticarət Nazirliyi və ya tapşırılacaq bir nazir müavininin sədrliyi ilə yeni yaradılmış Yaşıl Uzlaşma İşçi Qrupu aidiyyəti nazirliklərin yüksəksəviyyəli nümayəndələri ilə birlikdə icra prosesinə nəzarət edəcək və qiymətləndirmə aparacaq.
Həmçinin, aidiyyəti bütün dövlət qurumlarının öz məsuliyyət sahələri çərçivəsindəki xüsusi fəaliyyətlərə dair hər il irəliləyiş hesabatı təqdim etməsi məcburi olacaq.
