“Baykar” şirkətindən verilən açıqlamaya görə, Selçuk Bayraktar tərəfindən qurulan “Fergani Space Technologies” startapı milli mühəndislik imkanları ilə hazırlanmış FGN-100-d2 peykini oktyabrın 2-də Türkiyə vaxtı ilə saat 08:09-da ABŞ-ın Kanaveral burnundakı SLC-40 bazasından kosmosa göndərib. Beləliklə, startapın “Mövqe təyinatı bürcləri” layihəsinin ikinci mərhələsi uğurla başa çatıb.
Buraxılışdan təxminən 74 dəqiqə sonra, Türkiyə vaxtı ilə saat 09:23-də bu peyk buraxılış vasitəsindən ayrılıb və hədəf orbitinə uğurla daxil olub. O, daha sonra ilk telemetriya məlumatlarını ötürməklə rəsmi olaraq öz missiyasına başlayıb.
Buraxılış prosesini “Fergani Space” şirkətinin baş direktoru Selçuk Bayraktar və Özdemir Bayraktar Milli Texnologiya Mərkəzinin Kosmik Müşahidə və İdarəetmə Mərkəzindən canlı izləyiblər.
“Fergani Space” bu layihənin birinci mərhələsini 2025-ci il yanvarın 14-də uğurla başa vurub. İlk peyk - 102 kiloqramlıq FGN-100-d1 “Transporter-12” missiyasının bir hissəsi olaraq ABŞ-ın Vandenberq kosmik qüvvələr bazasından buraxılıb. Buraxılışdan təxminən 62 dəqiqə sonra peyk uğurla orbitə daxil olub və telemetriya məlumatlarını ötürməyə başlayıb.
Selçuk Bayraktar ikinci peykin də kosmosa uğurla çatdığını bildirib. O, bu peykin quracağı Uluğ Bəy Qlobal Mövqeləndirmə Sisteminin 100 kiloqramlıq sinfində sınaq peyki olduğunu əlavə edib.
S.Bayraktar 2022-ci ildə fəaliyyətə başlayan “Fergani Space” şirkətinin 135 komanda üzvü ilə səyahətinə davam etdiyini vurğulayıb. O, peyklərin mühəndisliyinin, sistemlərinin və dizaynlarının tamamilə yerli komanda tərəfindən öz resurslarından istifadə edilərək hazırlandığını və missiya müddətinin təxminən 5-7 il olacağını deyib. Bayraktar əlavə edib: “Məqsədimiz 5 il ərzində 100-dən çox peykə çatmaq, Uluğ Bəy Qlobal Mövqeləndirmə Sistemimizi müstəqil şəkildə xidmətə buraxmaq, həmçinin onu Türkiyəyə, habelə bütün dost və qardaş coğrafiyalarımıza təqdim etməkdir”.
Təxminən 510 kilometr yüksəklikdə aşağı Yer orbitində fəaliyyət göstərən FGN-100-d2 saniyədə 7,6 kilometr sürətlə hərəkət edir və gündə təxminən 15 dəfə Yer kürəsinin ətrafında fırnalır.
Milli avionika sistemləri, milli proqram təminatı inteqrasiyası, yaşıl hərəkətverici texnologiya sistemi, struktur dizaynı və ətraf mühit sınaqları da daxil olmaqla, peyk tamamilə "Fergani" mühəndisləri tərəfindən yerli resurslardan istifadə etməklə hazırlanıb. Peyk orbitdə işləmə, telemetriya və telekommunikasiya rabitəsi, yerləşdirmə və faydalı yük məlumatlarının ötürülməsi kimi imkanları sınaqdan keçirəcək.
