Türkiyənin xarici işlər naziri Hakan Fidan bildirib ki, rəsmi Ankara İranın daxili sabitliyini pozmağa yönəlmiş hər hansı plana qarşıdır.
O, bu ölkədə vətəndaş müharibəsi çıxarmaq, etnik və ya dini qruplar arasında qarşıdurma yaratmaq cəhdlərini qətiyyətlə rədd etdiklərini vurğulayıb.
Martın 12-də Ankarada almaniyalı həmkarı Yohan Vadeful ilə keçirdiyi birgə mətbuat konfransında çıxış edən Hakan Fidan bildirib ki, İranın ərazi bütövlüyünün qorunması çox vacibdir. O, bildirib ki, İran daxilindəki fərqli dini və etnik qrupları bir-birinə qarşı qızışdırmaq cəhdləri qəbulolunmazdır.
İsrailin Livanı bombalamasını tənqid edən nazir bu hücumların dövləti çöküş həddinə çatdırdığını bildirib. O, Benyamin Netanyahu hökumətini regionda qəsdən gərginlik yaratdığını söyləyib. Hakan Fidan Livan dövlətinin süquta uğramasının həm Yaxın Şərq, həm də qonşu ölkələr üçün ağır nəticələr doğuracağını vurğulayıb.
"İsrailin hücumları Livan dövləti süquta uğramadan dayandırılmalıdır", - deyən Hakan Fidan münaqişə səbəbindən insanların kütləvi şəkildə yurdundan-yuvasından didərgin düşməsini qəbuledilməz adlandırıb.
