Türkiyənin Monteneqrodakı səfiri Barış Kalkavan həftəsonu paytaxt Podqoritsada Monteneqro vətəndaşının bıçaqlanması hadisəsində Türkiyə vətəndaşlarının iştirakı ilə bağlı iddialara münasibət bildirib. Səfir hadisə ilə əlaqədar sürətli və əhatəli araşdırma aparılmasına çağırıb və hadisənin türk icmasını hədəf alan təxribata çevrilməməli olduğunu vurğulayıb.

Cümhuriyyətin 102-ci ildönümü və Respublika Günü münasibətilə keçirilən qəbulda çıxış edən Kalkavan Monteneqro hakimiyyətindən hücumda Türkiyə vətəndaşlarının iştirakına dair iddiaların tez və tam şəkildə araşdırılmasını, günahkarların isə ən qısa zamanda mühakimə olunmasını gözlədiklərini bildirib.

Kalkavan deyib: “Bu cinayətin türkləri hədəf alan təxribata çevrilməsi kədərlidir. Əsasən, hər gün bazarda, kafedə və məhəllədə salamlaşdığımız və bir araya gəldiyimiz gənc dostlara müraciət etmək istəyirəm. Bir neçə təxribatçının hiylələrinə aldanmayın. Türkiyə Respublikası bu dövrdə bütün hadisələr və onların nəticələri ilə bağlı lazımi hüquqi və siyasi addımları atacaq’’.

Səfir Türkiyə və Monteneqronun 146 ildən artıq tarixi əlaqələrə malik olduğunu xatırladaraq Monteneqronun sülh və rifahının Balkanlarda sabitlik üçün həyati əhəmiyyət daşıdığını qeyd edib.

O, həmçinin Monteneqro xalqını ksenofobiya və nifrət nitqi kimi qeyri-insani davranışların yayılmasına imkan verməməyə çağırıb.

Türkiyənin Monteneqrodakı səfiri bildirib ki, Monteneqro vətəndaşlarının əksəriyyəti son zamanlar türk icması ilə həmrəylik nümayiş etdirib. O, iki ölkə arasındakı əlaqələri dərin, çoxşaxəli və istənilən təxribata tab gətirəcək qədər güclü adlandırıb.

Səfir Monteneqroda yaşayan türk vətəndaşlarının təhlükəsizliyinin həm Türkiyə, həm də Monteneqro hakimiyyətləri tərəfindən təmin olunduğunu bildirib.

Monteneqro mediası xəbər verib ki, Podqoritsada Türkiyə vətəndaşlarının iştirakı ilə bıçaqlı hücum baş verib. Hücumda yaralanan şəxsin səhhətinin yaxşı olduğu bildirilib.

Hadisədən sonra Monteneqro Baş naziri Milojko Spajiç rəsmi ‘‘X’’ səhifəsində etdiyi paylaşımda Türkiyə vətəndaşları üçün vizasız səyahətin müvəqqəti dayandırıldığını açıqlayıb. Bu qərar paytaxtın bəzi yerlərində artan gərginlik, Türkiyə əleyhinə ritorika və kiçik etirazçı qrupların deportasiya çağırışları fonunda verilib.

Türkiyə hakimiyyəti və Monteneqrodakı səfirlik isə düşmən ritorikasını pisləyib və hadisənin iki ölkə arasında uzun müddətdir mövcud olan dostluq münasibətlərinə xələl gətirməməli olduğunu vurğulayıb.