7 oktyabr 2023-cü il tarixindən etibarən Yaxın Şərqdən, xüsusilə Fələstindən yayılan xəbərləri təfərrüatlı şəkildə izləmək çətinləşib.

İş o yerə çatıb ki, bəzi xəbərlər digərlərindən daha vacib olur, bəziləri isə xəbər sırasından demək olar ki, dərhal çıxır.

Bunlardan biri 20 fevral 2025-ci il, cümə axşamı gecəsi baş verdi. Təl-Əvivdə üç boş sərnişin avtobusuna yerləşdirilən bombalar partladıldı. Hadisə şəhərdə çaxnaşmaya səbəb oldu, İsrail rəsmiləri qisas almağa çağıraraq qəzəblərini ifadə etdilər.

Gözlənildiyi kimi, İsrail tez bir zamanda Fələstin müqavimətini günahlandırdı. Sosial şəbəkələrdə yayılan xəbərlərdə hücumun fələstinli qruplar tərəfindən işğal olunmuş İordan çayının qərb sahilinə son İsrail basqınlarına cavab olaraq həyata keçirildiyi bildirildi.

İsrail rəsmiləri partlamamış PUA-nın (əldə düzəldilmiş qurğu) yanında “Şəhidlər, Nəsrullah, Sinvar” yazılmış qeyd tapdıqlarını iddia etdilər. Bu, fələstinliləri günahlandırmaq üçün zəmin yaradırdı.

İsrail mətbuatı da sürətlə ittihamları Qəssam Briqadalarının Tulkerim Batalyonuna yönəltdi. Bununla belə, qruplaşma hücumda hər hansı əli olduğunu qəti şəkildə təkzib etdi.

Buna baxmayaraq, müharibəni qızışdıran israilli kütlənin dayanmaq niyyəti yox idi. Bombalamalardan bir neçə saat sonra İsrailin Baş naziri Benyamin Netanyahu işğal altındakı İordan çayının qərb sahilində əməliyyat keçirmək üçün göstəriş verdi.

Ertəsi gün Netanyahu Tulkarim qaçqın düşərgəsindəki fələstinlilərin evində hərbi komandirlərlə oturarkən görüntüləndi. Divara asılan İsrail bayrağı evlərindən didərgin salınan fələstinlilər üçün təhqiredici kimi qəbul edildi.

Sonrakı günlərdə xəbərlər silsiləsi başqa mövzulara keçid aldı. İsrail Bibas ailə üzvlərinin ölümü ilə bağlı təsdiqlənməmiş iddialar irəli sürsə də, region ölkələri diqqəti atəşkəsi bərpa etmək səylərinə yönəltdi.

Bəs, bombaları avtobuslara yerləşdirən və partladan kimdir? Partlayışlarla bağlı araşdırmanın ictimaiyyətə açıqlanan təfərrüatları belədir.

İsrail rəsmiləri avtobus partlayışlarının təfərrüatları ilə bağlı üç həftəlik yayıma qadağa qoydu. Bu qadağa İsrailin daxili təhlükəsizlik xidməti Şin Betin insidentdə əli olmaqda şübhəli bilinən iki yəhudi israillini həbs etdiyini elan etməsindən sonra qoyuldu.

İsrail məhkəməsi saxlanılan İsrail vətəndaşlarından birinin həbs müddətini daha 10 gün uzatdı.

İsrail hökuməti şübhəli şəxsə vəkili ilə görüşməyi qadağan etdi. Əlavə şübhəli və hadisədə əli olanların axtarışı davam edir. Şübhəlilərdən birinin vəkili ittihamları rədd edərək, müvəkkilini “İsrail torpağını və xalqını sevən bir insan” adlandırdı.

Hazırda daha çox məlumatımız yoxdur, çünki İsrail faktiki olaraq hər hansı məlumatın sızmasını qadağan edib.

Ancaq İsrailin uzun illərə gedib çıxan "terrorla mübarizə" tarixi bizə bir şey öyrətdisə, bu odur ki, əgər hücum həqiqətən də işğal olunmuş İordan çayının qərb sahilindən olan insanlar tərəfindən həyata keçirilsəydi, onların adları və şəkilləri üzləri çoxdan İsrail mətbuatında görünərdi və evləri çoxdan dağıdılmış olardı.

Avtobus partlayışları ilə bağlı iki yəhudi israillinin həbsi zorakılıq tərəfdarı yəhudi ifrat sağ hərəkatları ilə İsrail dövləti arasındakı mürəkkəb əlaqəni xatırlatmalıdır.