Türkiyə Respublikasının Prezidenti Rəcəb Tayyib Ərdoğanın 30 Avqust Zəfər Bayramı münasibətilə yayımladığı təbrik mesajı Türkiyə Respublikası Prezident Administrasiyasının İctimaiyyətlə Əlaqələr İdarəsinin rəsmi sosial şəbəkə hesabında paylaşılıb.

Tarixdə "Başkomandanlıq Meydan Döyüşü" kimi qeyd edilən və Milli Mübarizənin ən mühüm mərhələsini təşkil edən Böyük Zəfərin 104-cü ildönümünün qürurla qeyd edildiyini bildirən ölkə başçısı R.T.Ərdoğan əziz xalqın, Kipr türk xalqının və dünyanın müxtəlif ölkələrində yaşayan həmvətənlərin 30 Avqust Zəfər Bayramını təbrik edib.

Xaricdəki diplomatik missiyalarda bayram sevincinə və həyəcanına şərik olan qonaqlara da minnətdarlığını bildirən Prezident R.T.Ərdoğan mesajında deyib:

"30 Avqust Zəfəri ilə min ildir üzərində azad yaşadığımız torpaqların əzəli və əbədi vətənimiz olduğu bir daha təsdiqlənmişdir. Respublikamızın qurulmasına yol açan Böyük Zəfər millətimizin əsarəti heç vaxt qəbul etməyəcəyini bütün dünyaya bəyan etmişdir. Bu zəfər, eyni zamanda, coğrafiyamıza yönəlmiş imperialist mühasirənin də yarılmasına vəsilə olmuşdur."

Ağır imkansızlıqlara baxmayaraq 104 il əvvəl millətçə nümayiş etdirilən əzm, cəsarət və qətiyyətin bu gün də ən güclü ruhlandırıcı amil olduğunu vurğulayan dövlət başçısı R.T.Ərdoğan sözlərinə belə davam edib:

"Türkiyə şanlı tarixindən aldığı ilham və özünəinamla energetikadan müdafiə sənayesinə, elm və texnologiyadan xarici siyasətə qədər hər sahədə yazdığı uğur hekayələri ilə hədəflərinə doğru əmin addımlarla irəliləyir. Başda bölgəmiz olmaqla, dünyada müharibələrin, münaqişələrin, böhranların və siyasi qeyri-müəyyənliklərin artdığı bir dövrdə Türkiyə dövləti öz prinsiplərinə sadiq, qətiyyətli və bəşəri dəyərləri diqqətə alan təşəbbüskar siyasəti ilə ön plana çıxır."

Prezident R.T.Ərdoğan təbrik mesajını bu sözlərlə yekunlaşdırıb: "Məmnunluqla ifadə etmək istəyirəm ki, bu gün zülm kimdən gəlirsə gəlsin qarşısını almağa, məzlum kim olursa olsun ona dayaq durmağa çalışan və bu yolda yeri gəldikdə hər cür nəticəni gözə almaqdan çəkinməyən bir Türkiyə var. Üstümüzdəki mavi səma çökmədikcə, altımızdakı yer dağılmadıqca Türkiyəni və türk millətini müqəddəs mübarizəsindən heç kim yolundan döndərə bilməyəkdir.”