Çindən sonra dünyada ən çox sayda hərbi gəmi inşa edən Türkiyə bu sahədə NATO və Avropa İttifaqı (Aİ) ölkələri üçün nümunəyə çevrilə bilər. Son dövrlər Avropanın mühüm müdafiə sənayesi layihələrində ciddi böhran müşahidə olunur. Fransa ilə birlikdə icra etdiyi yeni nəsil qırıcı təyyarə proqramını ləğv edən Almaniya oxşar addımı hərbi gəmi istehsalı layihəsində də atıb.
Müdafiə və dənizçilik üzrə ekspert Kozan Səlçuk Erkan məsələni şərh edərək bildirib ki, Berlin administrasiyası bu layihə vasitəsilə ABŞ sistemləri ilə işləyəcək yüksək texnologiyalı gəmilər əldə etməyi hədəfləyirdi. Lakin bu addım maliyyə xərclərini artırdı. Nəticədə Almaniya proqramı dayandırmaq qərarına gəldi və daha az qabiliyyətə malik yerli istehsala əsaslanan aşağı büdcəli gəmilərə yönəldi.
Bu mərhələdə Türkiyənin müdafiə sənayesindəki mövqeyi xüsusi diqqət çəkir. Hazırda rəsmi Ankara eyni vaxtda 50-dən çox hərbi gəminin inşasını həyata keçirir ki, bunların da 15-dən çoxu xarici ölkələrin sifarişidir. Bu göstərici ilə Türkiyə dünyada ikinci pillədə qərarlaşıb. Ekspert Erkan Türkiyənin hərbi gəmi və sualtı qayıq istehsalında ən təcrübəli ölkələrdən biri olduğunu vurğulayıb.
O, Avropadakı fərqli siyasi dinamikaya və Türkiyənin SAFE fondundan kənarlaşdırılması cəhdlərinə diqqət çəkərək avropalıların daxili layihələri öz aralarında həll etməyə üstünlük verdiklərini bildirib. Səlçuk Erkanın sözlərinə görə, Avropa ölkələri hələlik təhlükənin ciddiliyini tam qavramadıqları üçün Türkiyənin qapısını döyməyə müqavimət göstərirlər. Lakin gələcəkdə müharibə riski daha da artarsa, Avropa dövlətləri vaxt itirməmək üçün öz layihələrindən imtina edərək Türkiyəyə müraciət edə bilərlər.
