İsrail Xarici İşlər Nazirliyinin Livanın cənubunun böyük bir hissəsini öz ərazisi kimi göstərən xəritə yayımlamasından sonra ‘‘Hizbullah’’ Livan hökumətinə müraciət edib. Təşkilat rəsmi Beyrutu İsraillə danışıqları dərhal dayandırmağa çağırıb.

‘‘Hizbullah’’ın bəyanatında bildirilir ki, ‘‘X’’ sosial şəbəkəsində yayımlanan həmin xəritə Təl-Əvivin Livan torpaqları və resursları üzərindəki işğalçılıq planlarını açıq şəkildə üzə çıxarır. Təşkilat İsraili danışıqlardan vaxt qazanmaq, Livan ərazisindəki mövcudluğunu möhkəmləndirmək və faktiki vəziyyəti qəbul etdirmək üçün istifadə etməkdə günahlandırıb.

Diplomatik müzakirələrə baxmayaraq, İsrail ordusunun Livanın cənubuna hücumları davam edir. Livan Səhiyyə Nazirliyinin məlumatına görə, martın 2-dən bəri həyata keçirilən hücumlar nəticəsində 4 333 nəfər həlak olub, 12 250 nəfər isə yaralanıb.

İsrail illərdir nəzarətində saxladığı təhlükəsizlik zonası ilə yanaşı, Livanın cənubundakı digər əraziləri də işğal altında saxlamağa davam edir.