Rusiya rəsmilərinin verdiyi məlumata görə, gecə saatlarında Ukrayna tərəfindən Rusiyanın Rostov-na-Donu şəhərinə və Belgorod vilayətinə hücumlar edilib. Hadisə zamanı təxminən iki şəxs həlak olub, iki uşaq da daxil olmaqla 12 nəfər xəsarət alıb.

Belgorod vilayəti rəhbərliyi “Max” sosial media platformasında hadisəylə bağlı bəyanat yayaraq, qəlpə yarası alan bir qadına hadisə yerində tibbi yardım göstərildiyini bildirilib.

Həmçinin qeyd olunub ki, digər yaralılar təcili tibbi yardım briqadaları tərəfindən xəstəxanalara çatdırılıb və müalicə altına alınıblar.

Vilayət rəsmilərinin sözlərinə görə, hücumdan sonra bir yaşayış binasındakı mənzildə və dayanacaqdakı 15-dən çox avtomobildə yanğın baş verib.

Yanğınsöndürənlər alovu söndürə biliblər. Hadisə nəticəsində bir fərdi yaşayış evi qismən yararsız hala düşüb, bir neçə yaşayış binasına da ciddi zərər dəyib.

Bölgə rəsmiləri ərazidə dəymiş əlavə ziyanın müəyyənləşdirilməsi istiqamətində işlərin davam etdiyini diqqətə çatdırıblar.