Avropa Komissiyasının sədri Ursula fon der Leyen Avropa İttifaqının ABŞ, Qətər, Misir və Türkiyənin vasitəçiliyi ilə Qəzzada atəşkəsin təmin olunmasına dair planı dəstəklədiyini bildirib.
O, bu barədə rəsmi "X" (əvvəlki Twitter) səhifəsində paylaşım edib.
“Avropa ABŞ, Qətər, Misir və Türkiyənin vasitəçiliyi ilə həyata keçirilən sülh planını dəstəkləyir. Bu gün Şarm əl-Şeyxdə müharibənin başa çatdırılması ilə bağlı anlaşmanın tamamlanması tarixi dönüş nöqtəsidir,” – deyə Ursula fon der Leyen paylaşımında vurğulayıb.
O, həmçinin qeyd edib ki, Avropa İttifaqı planın uğurla həyata keçirilməsi üçün bütün imkanları ilə dəstək verməyə hazırdır.
ABŞ prezidenti Donald Tramp İsrail və Fələstinin müqavimət hərəkatı “Həmas”ın Qəzzada atəşkəsin təmin olunmasına dair 20 bəndlik planın birinci mərhələsi üzrə razılığa gəldiyini açıqlayıb.
Plana görə, təxminən 2,000 fələstinli məhbusun azad edilməsi müqabilində bütün israilli girovlar sərbəst buraxılacaq və İsrail qüvvələri tədricən Qəzzadan çıxarılacaq.
Planın birinci mərhələsi ötən həftə cümə günü qüvvəyə minib.
İkinci mərhələ isə yeni idarəetmə orqanının yaradılmasını, Qəzzada çoxmillətli sülhməramlı qüvvələrin yerləşdirilməsini və “Həmas”ın tərksilah edilməsini nəzərdə tutur.
İsrailin 2023-cü ilin oktyabrından bəri Qəzzada törətdiyi hücumlar nəticəsində əksəriyyəti qadın və uşaq olmaqla, 67,800-dən çox fələstinli həyatını itirib.
