İndoneziya hakimiyyət orqanlarının məlumatına görə, ölkədə baş verən sel və torpaq sürüşmələri səbəbindən 200-dən çox insan həyatını itirib.

Qərbi Sumatra Regional Fəlakətlə Mübarizə agentliyinin sözçüsü İlham Vahab noyabrın 28-də verdiyi açıqlamada bildirib: “Bu axşam etibarilə 61 ölüm faktı qeydə alınıb və 90 nəfər hələ də axtarılır”.

Şimali Sumatrada isə 116 nəfər həyatını itirib, Açe əyalətində isə agentliyin açıqladığı rəqəmlərə əsasən, təxminən 35 adamın öldüyü bildirilib.

Ölkə rəsmiləri bildiriblər ki, baş verən fəlakətlə mübarizənin dördüncü günündə axtarış-xilasetmə işləri çətin relyef, zədələnmiş nəqliyyat yolları və əlverişsiz hava şəraiti səbəbindən ciddi şəkildə çətinləşməkdə davam edir. Buna görə də, təsirlənmiş bölgələrin əksəriyyətinə hələ də çatmaq mümkün olmadığı üçün ölüm sayının artacağı istisna edilmir.

Ağır texnikanın daxil olmasına imkan verməyən çətin relyef səbəbilə həmin bölgələrə hava yolu ilə yardım çatdırılmağa çalışılır.

Rəsmilərdən əldə olunan məlumata görə, bölgə administrasiyalarına ən sıx təxliyə mərkəzlərində səhiyyə məntəqələri və mətbəklərin yaradılmasını sürətləndirmək çağırışı edilib. Həmçinin bildirilib ki, yerli orqan rəhbərləri ilə intensiv şəkildə əlaqə saxlanılır, kritik logistika ehtiyacları müəyyənləşdirilir və itkin düşənlərlə bağlı məlumatlar yenilənir.