ABŞ-ın müharibə naziri Pit Heqset noyabrın 1-də verdiyi açıqlamada bildirib ki, Çinli həmkarı Donq Jun ilə hərbi səviyyədə birbaşa əlaqə kanallarının yaradılması barədə razılıq əldə olunub.

Bu barədə P.Heqset “X” platformasında yazdığı paylaşımda bildirib: “Admiral Donq və mən yaranacaq istənilən problemi həll etmək və gərginliyi azaltmaq məqsədilə hərbi əlaqə yollarının qurulması zərurəti barədə razılığa gəldik. Bu mövzuda yaxın vaxtlarda əlavə görüşlərimiz olacaq.”

Nazir vurğulayıb ki, sülh, sabitlik və qarşılıqlı hörmətə əsaslanan münasibətlər hər iki ölkə üçün ən doğru yoldur.

“ABŞ prezidenti Donald Trampın dediyi kimi, onun tarixi G2 görüşü ABŞ və Çin üçün qalıcı sülh və uğur baxımından möhkəm bir zəmin formalaşdırdı. Müharibə Nazirliyi də eyni məqsədi daşıyır — güc yolu ilə sülh, qarşılıqlı hörmət və müsbət münasibətlər”, - deyə nazir P.Heqset bildirib.

Qeyd edək ki, Donq Jun və Pit Heqset Cənub-Şərqi Asiya Dövlətləri Assosiasiyasının (ASEAN) müdafiə nazirləri sammiti çərçivəsində oktyabrın 31-də Malayziyanın paytaxtı Kuala-Lumpurda görüşüblər.

Xatırladaq ki, Amerika rəhbəri Donald Tramp da oktyabrın 30-da Cənubi Koreyanın liman şəhəri Busanda Çin Xalq Respublikası sədri Si Cinpinlə bir araya gəlib. D.Tramp bu görüşü “G2” – yəni “İki qrup” adlandırıb.