İsveçdə keçiriləcək NATO Xarici İşlər Nazirləri Toplantısından əvvəl Alyansın Baş katibi Mark Rutte ilə birgə mətbuat konfransı keçirən ABŞ dövlət katibi Marko Rubio İranla aparılan danışıqlarda müəyyən irəliləyişlərin olduğunu bildirib.
"Bəzi kiçik irəliləyişlər var, bunu şişirtmək istəmirəm, amma müəyyən hərəkətliliyin olması müsbət siqnaldır" deyən M.Rubio fundamental məsələlərin dəyişmədiyini və İranın heç vaxt nüvə silahına sahib olmasına icazə verilməyəcəyini vurğulayıb.
Vaşinqtonun Tehranla aparılan danışıqların nəticəsini gözlədiyini bildirən Dövlət katibi, uranın zənginləşdirilməsi və İranın yüksək dərəcədə zənginləşdirilmiş uran ehtiyatları məsələsinin mütləq həll olunmalı olduğunu vurğulayıb.
ABŞ rəsmisi İranın Hörmüz boğazında birtərəfli "tranzit rüsumu" tətbiq etmək istədiyini və bu prosesə Omanı da cəlb etməyə çalışdığını bildirib.
Dünyada heç bir ölkənin bu status-kvonu qəbul etməməli olduğunu qeyd edən ABŞ rəsmisi Hörmüz boğazındakı belə bir addımın digər strateji bölgələrdə də bənzər qanunsuz təşəbbüslərə səbəb ola biləcəyini bildirib.
NATO-nun Baş katibi Mark Rutte isə öz növbəsində İsveçdəki iclasda müdafiə xərcləri, Ukraynaya yardım və Hörmüz boğazında naviqasiya azadlığı mövzularına diqqət yetiriləcəyini bəyan edib. Vaşinqtona Ukraynaya verdiyi hərbi dəstəyə görə təşəkkür edən Baş katib bir çox müttəfiq ölkənin dənizdə naviqasiya azadlığının qəbuledilməz şəkildə pozulmasından narahat olduğunu vurğulayıb. Rutte həmçinin növbəti NATO Liderlər Sammitinin Ankarada keçiriləcəyini xatırladaraq müdafiə sənayesi istehsalı, yükün bölüşdürülməsi və qlobal təhlükəsizlik kimi kritik gündəm maddələri ilə bu toplantının ittifaq tarixindəki ən mühüm sammitlərdən biri olacağını vurğulayıb.
