Suriya prezidenti Əhməd Şəraa bildirib ki, rəsmi Dəməşq Rusiya ilə "tarixi və strateji" münasibətləri bərpa etməyə hazırdır.
Şəraa bu fikirləri oktyabrın 15-də Moskvada rusiyalı həmkarı Vladimir Putinlə keçirdiyi birgə mətbuat konfransında səsləndirib.
“Biz keçmiş razılaşmalara və Rusiya ilə olan tarixi әlaqәlәrimizә hörmətlə yanaşırıq. Rusiya ilə yaxın münasibətlərimiz mövcuddur və Suriyanın enerji sektorunun böyük bir hissəsi Rusiyanın təcrübəsinə əsaslanır.”
Putin isә öz növbәsindә Suriya ilə Rusiya arasında onilliklər boyu davam edən münasibətləri yüksək qiymətləndirdiyini bildirib.
Bu ayın əvvəlində Vladimir Putin Suriyada keçirilən parlament seçkilərini alqışlamış və rәsmi Moskvanın Dəməşqlə daha güclü əlaqələr qurmaqda maraqlı olduğunu bəyan etmişdi.
Əsədin ekstradisiyası məsələsi
Suriya hökumətindən bir rəsminin AFP agentliyinə verdiyi məlumata görə, Әhmәd Şəraa devrildikdən sonra Rusiyaya sığınan sabiq prezident Bəşər Əsədin ekstradisiyasını tələb etməyi planlaşdırır.
Həm Moskva, həm də Dəməşq bildiriblər ki, liderlər Rusiya hərbi bazalarının Suriyadakı gələcəyi ilə bağlı məsələləri də müzakirə edəcəklər.
Kreml görüşlə bağlı yaydığı açıqlamada qeyd edib ki, Moskvada keçiriləcək növbəti rəsmi görüşdə Rusiyanın Suriyadakı hərbi mövcudluğu da gündəmdə olacaq.
Kremlin sözçüsü Dmitri Peskov jurnalistlərə açıqlamasında deyib:
“Aydındır ki, bu məsələ hansısa formada söhbət zamanı gündəmə gələcək. Bu, tamamilə gözləniləndir.”
Hazırda Rusiyanın Suriyada iki əsas hərbi obyekti fəaliyyət göstərir: Tartus şəhərində yerləşən hərbi-dəniz bazası və Aralıq dənizi sahilindəki Hmeymim hava bazası.
