Peru prezidenti Xose Xeri paytaxt Lima və qonşu şəhər Kalyao liman bölgəsində artan cinayət hallarını nəzarət altına almaq məqsədilə 30 günlük fövqəladə vəziyyət elan edib.
Nazirlər Kabineti tərəfindən oktyabrın 21-də təsdiqlənən təhlükəsizlik tədbirləri gecə yarısından sonra qüvvəyə minəcək. Bu tədbirlər təhlükəsizlik qüvvələrinin birgə patrul xidməti aparmasına və əməliyyat keçirməsinə imkan yaradacaq. Eyni zamanda toplaşma və sərbəst hərəkət azadlığı kimi bəzi konstitusiya hüquqları müvəqqəti olaraq dayandırılacaq.
Prezident X.Xeri televiziyadakı çıxışında bildirib:
“Cinayətkarlıqla mübarizədə artıq müdafiədən hücuma keçirik. Bu mübarizə milyonlarla perulunun sülhünü, rahatlığını və təhlükəsizlik hissini bərpa etməyimizə kömək edəcək.”
Artan cinayət hallarına qarşı etirazlar
Ötən həftə baş verən şiddətli etiraz aksiyaları zamanı bir nəfər həlak olub, 100-dən çox şəxs yaralanıb.
Etirazçılar əsasən Z nəsli kimi tanınan gənclərdən ibarət olub. Onlar artan cinayət hallarına qarşı hökumətin daha sərt və təsirli tədbirlər görməsini tələb ediblər.
Xatırladaq ki, bu ayın əvvəlində vəzifəsindən kənarlaşdırılan keçmiş prezident Dina Boluartenin yerinə gələn Xose Xeri ötən həftə yeni hökumət kabinetini təqdim edərkən ictimai təhlükəsizliyi hökumətin əsas prioriteti olduğunu bəyan etmişdi.
Qeyd edək ki, Peru son illərdə təhlükəsizlik problemlərini həll etmək məqsədilə bir neçə dəfə fövqəladə vəziyyət rejimi elan edib. Lakin mütəxəssislər hesab edir ki, bu cür tədbirlər ancaq məhdud nəticələr verə bilər. Keçmiş prezident D.Boluarte də mart ayında oxşar şəkildə 30 günlük fövqəladə vəziyyət elan etmişdi, lakin ekspertlər bu addımın cinayət hallarının azalmasına təsir etmədiyini bildiriblər.
Prezident X.Xeri son fərmanla bağlı açıqlamasında hədəf alınan cinayətlərin xarakteri və miqyası barədə əlavə məlumat verməsə də, hökumətinin nizamı bərpa edəcəyini və vətəndaşların həyatını qoruyacağını vurğulayıb.
