Türkiyə Avropa Parlamentinin 2023–2024-cü illər üçün hazırladığı Türkiyə hesabatını sərt şəkildə rədd edib. Rəsmi Ankara sənədin ölkənin daxili və xarici siyasətinə dair həqiqətləri əks etdirmədiyini bildirib.

Türkiyə Xarici İşlər Nazirliyinin çərşənbə günü yaydığı bəyanatda Avropa Parlamentinin ümumi iclasında qəbul edilən hesabat kəskin şəkildə tənqid olunub. Nazirlik qeyd edib ki, sənəd “Türkiyə əleyhinə fikirlər səsləndirən terror təşkilatları və bəzi dairələr üçün təbliğat mühiti yaradan qurumun qərəzli yanaşmasını” əks etdirir.

Bəyanatda həmçinin vurğulanır:
“Terror təşkilatlarına təbliğat zəminləri yaradan qurumun və anti-Türkiyə mövqeyini əsas prinsipə çevirən bəzi dairələrin ölkəmizin daxili siyasi dinamikası, xarici siyasətimiz və prezidentimizin Şimali Kipr Türk Cümhuriyyətinə səfəri ilə bağlı əsassız və qərəzli qiymətləndirmələrini qətiyyətlə rədd edirik.”

Nazirlik Avropa Parlamentini xüsusilə Türkiyənin uzun müddətdir davam edən Aİ-yə üzvlük prosesi kontekstində daha obyektiv, balanslı və konstruktiv mövqe tutmağa çağırıb.

Bəyanatda həmçinin bu ifadələrə yer verilib:
“Bizim əsas gözləntimiz ondan ibarətdir ki, Avropa Parlamenti qarşıdakı dövrdə Aİ ilə əlaqələrimizin, o cümlədən üzvlük prosesimizin qarşılıqlı fayda əsasında davam etməsini təmin etmək üçün üzərinə düşən məsuliyyəti yerinə yetirsin.”