Qırğızıstan Prezident Sadır Japarov "Irıs Ordo" Konqres Mərkəzində keçirilən ŞƏT Dövlət Başçıları Şurasının iclası çərçivəsində ŞƏT-ə üzv ölkələrin dövlət və hökumət rəhbərlərini tək-tək qarşılayıb, ənənəvi "ailə fotosu" çəkdirilib.

Açılış nitqində Özbəkistanın 1 Sentyabr Müstəqillik Gününü təbrik edən Japarov, Özbəkistan Prezidenti Şavkat Mirziyoyevin bu əlamətdar gündə Bişkekdə olmasından məmnunluğunu ifadə edib.

Japarov toplantının ŞƏT-in 25-ci quruluş ildönümünə təsadüf etdiyini bildirərək, Qırğızıstanın sədrliyinin "ŞƏT-in 25 ili: Dayanıqlı Sülh, İnkişaf və Rifah Üçün Birlikdə" şüarı ilə həyata keçirildiyini qeyd edib.

Təşkilatın sərhəd təhlükəsizliyi mexanizmlərindən beynəlxalq aləmdə söz sahibi olan qlobal bir aktora çevrildiyini deyən Japarov, ŞƏT-ə üzv dövlətlərin dünya əhalisinin 40 faizindən çoxunu və qlobal Ümumi Daxili Məhsulun (ÜDM) təxminən dörddə birini təmsil etdiyini vurğulayıb.

Qırğızıstanın sədrlik fəlsəfəsinin "Birlik rifahın təməlidir" sözlərinə əsaslandığını diqqətə çatdıran Japarov, bu anlayışın Şanxay ruhunun mahiyyətini əks etdirdiyini bildirib.

Sədrliyi dövründə 200-ə yaxın tədbirin keçirildiyini qeyd edən Japarov təhlükəsizlik əməkdaşlığı, iqtisadi və nəqliyyat əlaqələri ilə yanaşı mədəni bağların inkişaf etdirildiyini, həmçinin rəqəmsal inkişaf və süni intellektin təşkilatın praktiki prioritetləri sırasına daxil edildiyini deyib.

Sadır Japarov ŞƏT-in 25-ci ildönümünün yalnız geridə qalan dörddəbir əsri yekunlaşdırmaqla kifayətlənməyib, dayanıqlı sülh, birgə inkişaf və rifah yönümlü yeni bir səhifə açmaq üçün mühüm imkan yaratdığını vurğulayıb.

Üzv dövlətlərin koordinasiyalı qərarları ilə təşkilatın inkişafında yeni mərhələnin başlayacağına inandığını bildirən Japarov çıxışının sonunda Şanxay Əməkdaşlıq Təşkilatı Dövlət və Hökumət Başçıları Şurasının iclasının rəsmən başladığını elan edib.

Mətbuata qapalı davam edən toplantının sonunda ŞƏT-in 25-ci ildönümünü rəmziləşdirən "Bişkek Bəyannaməsi" imzalanacaq.

ŞƏT Dövlət Başçıları Şurasının iclasında Belarus Prezidenti Aleksandr Lukaşenko, Hindistanın Baş naziri Narendra Modi, İran Prezidenti Məsud Pezeşkian, Qazaxıstan Prezidenti Qasım-Jomart Tokayev, Çin Xalq Respublikasının Sədri Si Tszinpin, Rusiya Prezidenti Vladimir Putin, Pakistanın Baş naziri Şahbaz Şərif, Tacikistan Prezidenti Emoməli Rəhmon və Özbəkistan Prezidenti Şavkat Mirziyoyev iştirak ediblər.

Toplantıdan sonra Prezident Rəcəb Tayyib Ərdoğanın da qatılacağı Şanxay Əməkdaşlıq Təşkilatının Dövlət və Hökumət Başçıları Sammiti (ŞƏT plyus) başlayacaq.

ŞƏT çərçivəsində tamhüquqlu üzv statusuna malik olmayan Türkiyə 2012-ci ildə təşkilata "dialoq tərəfdaşı" kimi qoşulub.