"New York Times" qəzetinin xəbərinə görə, lüks kruiz gəmisində hantavirus epidemiyasının yayılmasından sonra ABŞ-nin ən azı üç ştatında hantavirus infeksiyası şübhəsi olan şəxslər nəzarətə götürülüb, lakin izlənilən şəxslərin heç birində xəstəlik əlaməti aşkar edilməyib.
Ümumdünya Səhiyyə Təşkilatı (ÜST) son açıqlamasında "MV Hondius" gəmisində üç nəfərin həyatını itirdiyini və çox sayda insanda simptomların göründüyünü bildirib.
Mayın 6-da yayılan açıqlamada Corciya (Georgia) İctimai Səhiyyə Departamentinə istinad edilərək, ştatın iki sakininin izlənilməyə davam etdiyi, hər ikisinin sağlamlıq vəziyyətinin yaxşı olduğu və infeksiya əlaməti göstərmədikləri qeyd olunub.
Məlumatda Kaliforniya İctimai Səhiyyə Departamentinin də CDC tərəfindən gəmidə ştat sakinlərinin olması barədə məlumatlandırıldığı və qurumun yerli rəsmilərə xəstələrin izlənilməsi mövzusunda kömək etdiyi vurğulanıb.
Ştat rəsmisi digər bir sərnişinin Arizona sakini olduğunu, onda hər hansı simptomun müşahidə edilmədiyini və vəziyyətinin nəzarətdə saxlanıldığını bildirib.
ABŞ sərnişinlərin vəziyyətini izləyir
CDC həmçinin ABŞ-nin sərnişinlərin vəziyyətini yaxından təqib etdiyini bəyan edib.
CDC-nin açıqlamasında deyilir: “Dövlət Departamenti sərnişinlərlə birbaşa təmas, diplomatik koordinasiya, habelə milli və beynəlxalq səhiyyə qurumları ilə əməkdaşlıq daxil olmaqla, hökumət səviyyəsində əlaqələndirilmiş müdaxilə həyata keçirir”.
“Riski azaltmaq üçün texniki yardım və rəhbərlik təmin etmək məqsədilə beynəlxalq tərəfdaşlarımızla sıx əməkdaşlıq edirik”, - deyə bildirən CDC Amerika xalqı üçün riskin son dərəcə aşağı olduğunu əlavə edib.
CDC-nin məlumatına görə, hantavirus gəmiricilərlə təmas vasitəsilə, xüsusən də gəmiricilərin sidik və tüpürcəyinə məruz qaldıqda insanlara yoluxa bilir, lakin insandan insana yoluxma hallarına nadir rast gəlinir.
