Türkiyənin xəzinə və maliyyə naziri Mehmet Şimşək İstanbulda keçirilən Qlobal İslam İqtisadiyyatı Sammitində qlobal iqtisadiyyat, İslam maliyyəsinin rolu və Türkiyənin iqtisadi proqramı barədə mühüm açıqlamalar verib. Nazir qlobal kapital axınlarının getdikcə real iqtisadiyyatdan uzaqlaşdığını vurğulayıb
M.Şimşək qeyd edib ki, qlobal investisiya rəqəmləri artsa da, bu vəsait real istehsala deyil, sadəcə maliyyə mərkəzləri arasında dövr edir. O, İslam maliyyəsinin real aktivlərə əsaslanan və qazanc-itki ortaqlığına söykənən modelinin bu vəziyyətə qarşı ən doğru alternativ olduğunu bildirib.
Geoiqtisadi parçalanma, istehsalın ölkə daxilinə köçürülməsi təzyiqləri və təchizat zəncirlərinin yenidən qurulması səbəbindən inkişaf etməkdə olan ölkələrin qlobal investisiyalardakı payının son üç ildə 67 faizdən 54 faizə düşdüyünü qeyd edən nazir İslam maliyyə aktivlərinin 2000-ci ildən bəri təxminən 49 dəfə artdığını diqqətə çatdırıb. Onun sözlərinə görə, bu artıma baxmayaraq sektorun qlobal maliyyədəki payı hələ də aşağıdır. Türkiyənin İslam maliyyə aktivlərinə görə dünyada doqquzuncu yerdə olduğunu bildirən M.Şimşək hədəfin ilk beşliyə daxil olmaq olduğunu və İstanbul Maliyyə Mərkəzinin bu sahədə qlobal rol oynamalı olduğunu vurğulayıb.
M.Şimşək Türkiyənin iqtisadi proqramına toxunaraq hökumətin qiymətləri sabitləşdirmək, büdcəyə nəzarət etmək və xərclərlə gəlirlər arasındakı balansı qorumaq məsələsində qətiyyətli olduğunu bildirib.
O, həmçinin Türkiyənin büdcə kəsirinin ÜDM-in 2,9 faizini, dövlət borcunun isə ÜDM-in 24 faizini təşkil etdiyini bildirərək makroiqtisadi göstəricilərin möhkəmliyini vurğulayıb.
M.Şimşək Türkiyəyə investisiya cəlb etmək məqsədilə qəbul edilən yeni vergi təşviqlərini də açıqlayıb. Yeni qanuna əsasən, sənaye və kənd təsərrüfatı istehsalçıları üçün korporativ vergi dərəcəsi 12,5 faizə endirilib ki, bu da qlobal bazarlarda ən rəqabətli dərəcələrdən biridir. Bundan əlavə, proqram təminatı, video oyunlar, tibbi turizm, təhsil və mühəndislik kimi xidmət ixracına 100 faiz vergi güzəşti, İstanbul Maliyyə Mərkəzində fəaliyyət göstərən şirkətlərin tranzit ticarətinə isə sıfır korporativ vergi tətbiq edilir.
