Pakistan təhlükəsizlik mənbələri bəyan edib ki, mayın 9-da səhər tezdən Hindistanın açıq təcavüzünə cavab vermək üçün “Bunyan-un-Marsoos əməliyyatı”na başlayıb.
Bəyanatda həmçinin qeyd olunub: “Cavab hücumlarında Hindistanda bir çox hədəf nişan alınıb. “Bunyan-un-Marsoos” ifadəsi “möhkəm quruluş” və ya “keçilməz divar” mənasına gəlir.”
Pakistan ordusu, hədəflərinin Hindistanın “Brahmos” raket anbarı ilə Kəşmirin Hindistan idarəsindəki hissəsində yerləşən Pathankot və Udhampur bölgələrindəki hava bazaları olduğunu bildirib.
“Reuters” xəbər agentliyi Hindistanın hərbi mənbələrinə istinadən bildirib ki, Hindistan hazırda Pakistana havadan hücumlar həyata keçirir.
Kəşmirin Hindistan nəzarətindəki bölgələrində yaşayan sakinlər bir çox ərazidə güclü partlayış səsləri eşitdiklərini bildiriblər.
Hindistan raketləri
Pakistan ordusunun mətbuat katibi ölkənin cavab hücumlarından əvvəl Hindistanın Pakistan daxilindəki üç hava bazasına raket endirdiyini, lakin bu raketlərin çoxunun zərərsizləşdirildiyini açıqlayıb.
Qeyd edək ki, bu son hadisələr ötən ay Hindistanın Pakistana qarşı irəli sürdüyü silahlı qətliam iddiaları ilə alovlanan gərginliyin nəticəsidir.
Rəsmi İslamabad həmin qətliamla bağlı bütün iddiaları rədd edərək hadisəsinin qərəzsiz şəkildə araşdırılması üçün müstəqil beynəlxalq istintaqın aparılmasına çağırış etmişdi, lakin Hindistan tərəfi buna razı olmayıb.
Hindistan ordusu mayın 9-da verdiyi açıqlamada bildirib ki, Pakistan sərhədinə yaxın Hindistan əyalətlərində, o cümlədən Srinagar şəhəri də daxil olmaqla, Kəşmirin Hindistan nəzarətindəki 26 bölgəsində pilotsuz uçuş aparatları müşahidə olunub. “Vəziyyət yaxından və davamlı şəkildə izlənilir, lazım olan hər yerdə sürətli şəkildə müdaxilə olunur” deyə əlavə edib.
