Tailandda son illərdə baş verən en ölümcül məktəb hücumlarından birində, bu gün (7 avqust 2026) Banqkokun dərhal şimalında yerləşən bir liseydə atəş açan gənc şagird yeddi nəfəri öldürdükdən sonra həyatını itirib.
Daxili İşlər nazirinin müavini Polapi Suvançvi Nontaburi bölgəsindəki "Debsirin Nonthaburi" məktəbində törədilən hücumda iki şagird və iki müəllimin həyatını itirdiyini bildirib. Hadisə zamanı həmçinin 15 şagird yaralanıb. Xəsarətlərin çoxu birbaşa atəş açılması nəticəsində deyil, şagirdlər hadisə yerindən qaçmağa çalışarkən baş verib.
Hüquq-mühafizə orqanları şübhəlinin həmin məktəbin şagirdlərindən biri olduğunu müəyyən ediblər. Yerli media şübhəlinin daha sonra həyatını itirdiyini xəbər versə də, onun polis tərəfindən vurulduğu, yoxsa intihar etdiyi barədə fərqli məlumatlar yayılıb.
Təhqiqat silahın mənbəyinə yönəlib
Rəsmilər şübhəlinin tapançadan istifadə etdiyini bildiriblər. Daxili İşlər Nazirliyi isə yeniyetmənin silaha necə yiyələnməsi ilə bağlı təhqiqata başlayıb.
Bu hücum hökumətin silah qanunvericiliyini sərtləşdirməyə dair dəfələrlə verdiyi vədlərə baxmayaraq, təxminən 10 milyon odlu silahın dövriyyədə olduğu Tailandda silahlı zorakılıqla bağlı narahatlıqları yenidən artıran son hadisə olub.
Ölkədə son illərdə bir çox səs-küylü silahlı hücumlar baş verib. Bunların arasında keçmiş polisin Tailandın şimal-şərqindəki uşaq bağçasında 24-ü uşaq olmaqla 36 nəfəri qətlə yetirdiyi 2022-ci il qətliamı da var.
