ABŞ, İran və regional vasitəçilərdən ibarət qrup, 28 fevraldan bəri davam edən müharibəni daimi olaraq dayandıra biləcək 45 günlük mümkün atəşkəsin şərtlərini müzakirə ediblər.
Hesabatlarda yaxın 48 saat ərzində qismən razılığın əldə olunma ehtimalının zəif olduğu qeyd edilsə də, bu cəhdin dramatik gərginliyin qarşısını almağın yeganə yolu olduğu qiymətləndirilir.
Belə bir gərginlik İranın mülki infrastrukturuna yönəlmiş böyükmiqyaslı hücumları və Körfəz ölkələrindəki enerji və su obyektlərinə qarşı qisas addımlarını əhatə edə bilər.
Bundan əvvəl ABŞ prezidenti Donald Tramp ultimatumunun müddətini 20 saat uzadaraq yeni son tarixi aprelin 7-si, Şərq vaxtı ilə (EST) saat 20:00 olaraq açıqlayıb.
Tramp ölkəsinin "intensiv danışıqlar apardığını" və razılığın əldə oluna biləcəyini söyləyib. "Yaxşı bir ehtimal var, amma razılaşmasalar, oradakı hər şeyiməhv edərəm", -deyə o bildirib.
İki mərhələli təklif
Danışıqların Pakistan, Misir və Türkiyə vasitəçiləri ilə yanaşı, xüsusi elçi Stiv Vitkoff və İranın xarici işlər naziri Abbas Əraqçi arasındakı birbaşa mesajlaşmalar yolu ilə aparıldığı qeyd edilib.
Təklif olunan iki mərhələli razılaşma 45 günlük atəşkəsdən sonra müharibənin tamamilə dayandırılmasını nəzərdə tutur.
Vasitəçilər Hörmüz boğazının yenidən açılmasının və İranın yüksək dərəcədə zənginləşdirilmiş uran məsələsinin həllinin yalnız yekun razılaşma ilə mümkün olacağı qənaətindədirlər.
İranlılar atəşkəsin yalnız kağız üzərində qaldığı bir "Qəzza və ya Livan ssenarisi" istəmədiklərini açıq şəkildə bildiriblər.
Digər tərəfdən, İslam İnqilabı Keşikçiləri Korpusunun (SEPAH) hərbi dəniz qüvvələri sərt mövqe nümayiş etdirərək, Hörmüz boğazındakı vəziyyətin "heç vaxt müharibədən əvvəlki vəziyyətə qayıtmayacağını" ifadə edib.
Vasitəçilər İran rəsmilərinə manevr üçün daha vaxtın qalmadığını, növbəti 48 saatın böyük dağıntıların qarşısını almaq üçün son fürsət olduğunu vurğulayıblar.
