Kiyev Rusiyanın Kostyantinovkanı ələ keçirdiyi iddiasını rədd edərək, şərqdəki şəhərinin Ukraynanın nəzarəti altında olduğunu açıqlayıb. Hər iki tərəf neft, təbii qaz və hərbi infrastrukturu hədəf alan hücumların yenidən intensivləşdiyini bildirib.
Ukrayna Baş Qərargahı Moskva qüvvələrinin şərqdə kritik əhəmiyyətə malik Konstantinovka şəhərini ələ keçirdiyinə dair Rusiyanın iddialarını rədd edib.
Baş Qərargahın rəsmisi iyulun 4-də verdiyi bəyanatda deyib: "Bu açıqlamanı təkzib edirik. Bunlar növbəti əsassız iddialardan ibarətdir. Konstantinovka şəhəri Ukrayna qüvvələrinin nəzarətində qalmağa davam edir. Şərq Qrupu 19-cu Ordu Korpusunun tabeliyindəki hərbi hissələr və altbölmələr şəhər daxilində müəyyən edilmiş xətlərdə və şəhərə yaxın ərazilərdə müdafiə əməliyyatlarını davam etdirirlər".
Rusiya ordusu iyulun 3-də Prezident Vladimir Putinə Moskvanın Donetsk bölgəsindəki irəliləyişində uzun müddətdir ələ keçirməyi hədəflədiyi strateji nöqtə olan Konstantinovkaya nəzarəti təmin etdikləri barədə məlumat vermişdi. Analitiklər Konstantinovkanın ələ keçirilməsinin Rusiya qüvvələrinə, hazırda əməliyyatlarının əsas oxu olan bu müdafiə qurşağı boyu şimala doğru irəliləmək üçün dayaq nöqtəsi yaradacağını qeyd edirlər. Rusiya ordusu bir müddətdir ki, Ukraynanın Donetskdəki "qala qurşağı" olaraq adlandırılan və güclü şəkildə möhkəmləndirilmiş bir neçə şəhərindən biri olan Konstantinovkanın bəzi hissələrinə nəzarət etdiyini bildirirdi.
Ukrayna PUA-sı Sankt-Peterburqdakı neft terminalını vurub
Digər tərəfdən, Rusiya rəsmiləri iyulun 4-də verdikləri açıqlamada Ukraynanın gecə saatlarında Sankt-Peterburq limanındakı neft terminalına hücum etdiyini bildiriblər.
Ayrı bir bəyanatda Rusiya Müdafiə Nazirliyi “Telegram” vasitəsilə hava hücumundan müdafiə sistemlərinin Rusiyanın müxtəlif bölgələrində, Moskva tərəfindən 2014-cü ildə ilhaq edilmiş Krımda, həmçinin Azov və Qara dəniz üzərində Ukraynaya məxsus 389 PUA-nı zərərsizləşdirdiyini və ya məhv etdiyini elan edib. Ukrayna Prezidenti Volodimir Zelenski də iyulun 4-də “Telegram”da etdiyi paylaşımda Ukrayna ordusunun gecə saatlarında Rusiyanın Sankt-Peterburq şəhəri yaxınlığındakı neft və hərbi obyektlərinə zərbələr endirdiyini təsdiqləyib.
Rusiya Ukraynadakı qaz hasilatı obyektini vurub
Ukraynanın dövlət enerji şirkəti "Naftoqaz" Rusiyanın Ukraynanın mərkəzi hissəsindəki Poltava vilayətində yerləşən qaz hasilatı obyektini PUA ilə vurduğunu və yanğına səbəb olduğunu açıqlayıb. "Naftoqaz" “Telegram”da yaydığı bəyanatda, "Hücumdan sonra ərazidə yanğın baş verib. Müəssisənin fəaliyyəti dayandırılıb", -deyə bildirib. Açıqlamada həmçinin, "Düşmən Ukraynanın daxili hasilatını azaltmaq və qış mövsümünə hazırlıqları çətinləşdirmək məqsədilə qaz hasilatı obyektləri sistemli şəkildə hədəf alır", -deyə qeyd edilib.
