İran Milli Təhlükəsizlik Ali Şurası ölkənin Atom Enerjisi üzrə Beynəlxalq Agentliyi ilə əməkdaşlığının dayandırılması barədə qərar qəbul edib.

Buna səbəb ''E3'' ölkələrinin (Birləşmiş Krallıq, Almaniya və Fransa) BMT Təhlükəsizlik Şurasının İrana qarşı sanksiyalarını bərpa etməyə yönəlmiş addımları olub.

Dövlət yayımı olan “Press TV”nin yaydığı açıqlamada qeyd edilib ki, İranın yüksək təhlükəsizlik orqanı “E3” ölkələrinin Tehranın nüvə proqramı ilə bağlı “ehtiyatsız” addımlarını sərt şəkildə tənqid edib.

İran prezidenti Məsud Pezeşkian sentyabrın 20-də verdiyi bəyanatda bildirib ki, ölkə “snapback” mexanizmi ilə sanksiyaların bərpasının qarşısını almağa qadirdir.

‘‘Onlar 'snapback'dən keçən yolu bağlamağa çalışırlar, lakin bu yolu açan ağıl və ideyalardır. Biz heç vaxt həddindən artıq tələblərə boyun əyməyəcəyik, çünki vəziyyəti dəyişdirmək gücümüz var’’,-deyə Məsud Pezeşkian vurğulayıb.

İranın Ali Milli Təhlükəsizlik Şurası həmçinin sanksiyaların bərpa olunacağı təqdirdə Atom Enerjisi üzrə Beynəlxalq Agentliklə əməkdaşlığı dayandıracağı barədə xəbərdarlıq edib.

Qeyd edək ki, bu ayın əvvəlində İran və AEBA arasında razılaşma əldə olunub. Bu razılaşma ABŞ və İsrail tərəfindən bombalanmış obyektlər də daxil olmaqla, bəzi nüvə obyektlərində yoxlamaların bərpasını nəzərdə tutur. Lakin razılaşmanın detalları hələlik ictimaiyyətə açıqlanmayıb.