Parisdə ABŞ-ın vasitəçiliyi ilə keçirilən danışıqlar razılaşma olmadan başa çatdıqdan sonra Dəməşq milli suverenliyi vurğulayıb və xarici müdaxiləni rədd edib.
Suriyanın diplomatik mənbəsinin "Al-Ikhbariya" dövlət televiziyasına istinadən verdiyi məlumata görə, Parisdə Suriya və İsrail rəsmiləri arasında ilkin danışıqlar razılıq əldə olunmadan başa çatıb.
Danışıqlar barədə məlumat yayan mənbənin bildirdiyinə görə, ABŞ-ın vasitəçiliyi ilə keçirilən görüş sadəcə Suriyanın cənubunda gərginliyin azaldılması və aylarla davam edən gərginlikdən sonra rabitə kanallarının bərpasına yönəlmiş “ilkin məsləhətləşmələr” olub.
“Heç bir yekun razılıq əldə olunmayıb”, - deyə bildirən mənbə Suriya nümayəndə heyətinin uzun müddətdir ki, milli birlik və suverenlik prinsiplərinə sadiq qaldığını bildirib.
Mənbə qeyd edib ki, Suriya nümayəndə heyəti Süveyda və onun əhalisinin “Suriya dövlətinin ayrılmaz hissəsi olduğunu və heç bir səbəbdən təcrid oluna və ya hədəfə alına bilməyəcəyini” vurğulayıb.
Suriya tərəfi İsrailin bəzi bölgələri hədəf alan qanun pozuntularına görə, xüsusilə dekabrın 8-dən sonra yaranan son gərginlikdə İsraili günahlandırıb. Nümayəndə heyəti davam edən aqressiv hərəkətlərin “regional sabitliyi təhdid etdiyini” bəyan edib və Suriyanın sahədə yeni reallıqların tətbiqini qəbul etməyəcəyini bir daha vurğulayıb.
Danışıqlarda həmçinin beynəlxalq təminatların yerinə yetirilməsi şərti ilə sazişin yenidən aktivləşdirilməsinin mümkünlüyü müzakirə edilib və Suriya İsrailin son vaxtlar irəlilədiyi bölgələrdən dərhal geri çəkilməsini tələb edib.
Konkret nəticə əldə olunmasa da, tərəflər vəziyyətə nəzarət etmək və sabitliyi təşviq etmək yollarını qiymətləndirmək üçün yaxın vaxtlarda əlavə görüşlər keçirmək barədə razılığa gəliblər.
"Danışıqlar birbaşa və məsuliyyətlə aparılıb", - deyə bildirən mənbə əlavə edib ki, lakin indiki mərhələdə heç bir razılıq əldə olunmayıb.
Ekspertlər görüşün Suriya ilə İsrail arasında gərginliyin artdığı bir vaxtda baş tutduğunu qeyd edirlər.
Qeyd edək ki, iyulun 13-də Süveydada bədəvi ərəb qəbilələri ilə silahlı druz milisləri arasında toqquşmalar baş verib. Zorakılıq artdıqca, İsrail Dəməşq də daxil olmaqla Suriyanın hərbi mövqelərini və infrastrukturunu hədəf alan hava hücumlarına başlayıb.
İsrail öz hücumlarını "druz icmalarını qorumaq" kimi əsaslandırsa da, Suriyadakı əksər druz liderləri hər hansı xarici müdaxiləni açıq şəkildə rədd etdilər və vahid Suriya dövlətinə sadiqliklərini təsdiqlədilər. Toqquşmalardan sonra bölgədə atəşkəs elan edilib.
Suriyanın yeni hökuməti keçmiş hakimiyyətin lideri Bəşər Əsədin 2024-cü il dekabrın 8-də devrilməsindən sonra ölkə daxilində asayişi bərpa etməyə çalışır.
