Türkiyə Prezidenti Administrasiyasının İctimaiyyətlə Əlaqələr İdarəsi Qəzzadakı hadisələrin həm humanitar, həm də tarixi nəticələrini sənədləşdirən “Həqiqətin təhrif edilməsi: İsrailin jurnalistlərə qarşı müharibəsi” adlı kitabı nəşr edib.
İdarənin dekabrın 10-da yaydığı bəyanata görə, türk, ingilis və ərəb dillərində nəşr olunan kitab xüsusilə 2023-cü ilin oktyabr ayından bəri Qəzzada jurnalistlərin sistemli şəkildə hədəf alınması və yaşadıqları zorakılıq hadisələrindən bəhs edir.
Məlumata görə, kitabın giriş sözünü Prezident Rəcəb Tayyib Ərdoğanın qələmə alıb. Kitabda İsrailin Qəzzada jurnalistləri hədəf alması, rabitə infrastrukturunu qəsdən məhv etməsi və həqiqəti üzə çıxaran səsləri susdurmaq səyləri ətraflı sənədlər və ifadələrlə təqdim olunur.
Kitabda jurnalistlərin evlərinin bombalanması, ailələrinin hədəf alınması və 37-si qadın olmaqla 283 jurnalistin gülləkeçirməz jiletlər və kameralarla vəzifələrini yerinə yetirərkən İsrail tərəfindən öldürülməsi faktları əks olunub.
Prezident Rəcəb Tayyib Ərdoğan bildirib ki, bəşər tarixi həmişə münaqişələrin və müharibələrin şahidi olub və bu böhranlarla bağlı məlumatlar bu günə qədər qorunub saxlanılıb.
Tarix yazmağın, tarix yaratmaq qədər vacib olduğunu vurğulayan Prezident Ərdoğan bildirib ki, dünyanın axarını dəyişdirəcək hadisələrin ardıcıl baş verdiyi bu dövrdə mətbuat işçiləri baş verənləri sənədləşdirərək təkcə bu günü düzgün anlamaqla kifayətlənmir, həm də gələcək nəsillərə ötürüləcək məlumatları təmin edir.
Ərdoğan bildirib ki, tarixi məlumatları qorumaq və həqiqəti ictimaiyyətə dəqiq çatdırmaq üçün böyük səy göstərən mətbuat nümayəndələrinin xüsusən də münaqişə və müharibə zonalarında fəaliyyət göstərə bilmələrinin təmin edilməsi dövlətlərin ən vacib vəzifələrindən biridir.
R.T.Ərdoğan həmçinin bu ifadələrə yer verib: “Beynəlxalq ictimaiyyətin İsrailin 7 oktyabr 2023-cü ildən bəri Qəzzada törətdiyi soyqırıma reaksiyası, vurğulamağa çalışdığımız həqiqətin xəbərçisidir. İsrailin məqsədi yalnız işğal və kütləvi cəza yolu ilə əsasən qadın və uşaqları qətlə yetirmək deyil, həm də bu qətliamları heç vaxt baş verməmiş kimi göstərmək və beynəlxalq ictimaiyyəti Qəzzada etdiklərinin normal olduğuna inandırmaqdır. İsrail buna nail olmaq üçün qurduğu hekayənin arxasındakı həqiqəti ortaya çıxarmağa çalışan jurnalistləri hədəf alır’’.
Ərdoğan bildirib ki, İsrail müharibə və humanitar hüquq normalarına məhəl qoymayaraq həqiqəti çatdırmağa çalışan jurnalistlərin evlərini və ailələrini bombalayıb, nəticədə Qəzzadakı jurnalistlər təkcə mətbuat azadlığından deyil, həm də yaşamaq hüququndan məhrum olublar.
“İsrail tərəfindən amansızcasına qətlə yetirilən jurnalistlərin qətiyyətli mübarizəsini hörmətlə qarşılayıram. Mətbuat tarixində cəsarətləri ilə mühüm yer tutan, həyatları bahasına həqiqəti ifadə etməyə çalışan bu jurnalistlərin məlumatlarının daha geniş auditoriyaya çatmasını təmin etmək üçün çalışmağa davam edəcəyik”,-deyə Türkiyə Prezidenti vurğulayıb.
