BMT-nin Beynəlxalq Miqrasiya Təşkilatının yaydığı yazılı bəyanatda Cibuti sahillərində 305 nəfərin olduğu qayığın batdığı qeyd olunub. Hadisə nəticəsində 139 nəfər həlak olub, 84 adam isə itkin düşüb.
BMT-dən verilən açıqlamada batan qayığın oktyabrın 9-u gecə saatlarında 305 sərnişinlə Cibutidən Yəmənə doğru yola çıxdığı bildirilib.
Açıqlamada sözügedən hadisənin Şərq Marşrutunda qeydə alınan ən ölümcül gəmi qəzalarından biri olduğu vurğulanıb.
Qeyd edilib ki, bu marşrut Afrika Buynuzu ölkələrindən olan qanunsuz miqrantların Qırmızı dənizi keçərək Yəmən üzərindən Körfəz ölkələrinə getməyə çalışdığı təhlükəli marşurutdur.
Bəyanatda BMT-nin baş direktoru Emi Pounun da fikirlərinə yer verilib. E.Pou məsələ ilə bağlı deyib: "Başqa təhlükəsiz bir yolun olduğunu bilsələrdi, heç kim belə bir qayığa minməzdi. Bu ölümlərə adi bir hal kimi yanaşmağa davam edə bilmərik. Təhlükəsiz və qanuni yollar insan həyatını xilas edir."
