ABŞ Prezidenti Donald Tramp ötən il intihar edən Cefri Epşteynə yazdığı iddia edilən məktubla bağlı xəbər yayımladığı üçün "The Wall Street Journal" qəzetini məhkəməyə verməklə hədələyib.

Cümə axşamı yayımlanan və Vaşinqtonda sürətlə rezonans doğuran xəbərə görə, Trampın imzası olan həmin məktub Epşteynin 2003-cü ildəki 50 illik yubileyi üçün hazırlanmış kolleksiyanın bir hissəsi olub.

"The Wall Street Journal" məktubu nəzərdən keçirdiyini, lakin vizualını dərc etmədiyini bildirib.

Tramp "Truth Social" platformasında paylaşdığı açıqlamada nəşri sərt şəkildə tənqid edib:
“Wall Street Journal” və Rupert Merdoka şəxsən xəbərdarlıq etdim: Prezident Donald J. Trampın Epşteynə yazdığı iddia edilən məktub saxtadır və əgər dərc olunarsa, hüquqi məsuliyyət daşıyacaqlar. Cənab Merdok bu məsələ ilə məşğul olacağını desə də, görünür, bunun üçün yetərli gücə sahib deyil. Qəzetin redaktoru Emma Takerə, Karoline Leavitt və Prezident Tramp tərəfindən məktubun saxta olduğu bildirilsə də, o, bu iddianı qulaqardına vurdu. Əvəzində, uydurma, qərəzli və prezidentə qarşı hörmətsiz xəbərlərlə yoluna davam etdi," – deyə Tramp bildirib.

Tramp bildirib ki, mətbuat orqanları  həqiqəti yazmağı öyrənməlidir və mövcud olmayan mənbələrə istinad etməməlidir.